Сәттібаев пен Сафиуллин топ жарды

Әзербайжанның астанасы Бакудегі «Шаган» олимпиадалық спорт кешенінде бокстан ересектер арасындағы дәстүрлі «Ұлы Жібек жолы -2014» турнирі болып өтті. Өткен жексенбіде мәресіне жеткен бәсеке қорытындысы бойынша қазақ елінің боксшылары 2 алтын, 1 күміс және 1 қола медальға ие болды. Әлемнің 9 елінен 130 былғары қолғап шеберлері қатысқан айтулы жекпе-жекте еліміздің талантты боксшылары Олжас Сәттібаев (52 кг) пен Закир Сафиуллин (60 кг) турнир жеңімпазы атанды. Ал Дәурен Елеусінов (81 кг) күміс медальды олжалады. Қола медаль Сағадат Рахманқұловқа бұйырды.  

«АҚТӨБЕ» – СУПЕРКУБОК ИЕГЕРІ

Сенбі күні «Ақтөбе» командасы еліміздің былтырғы чемпионы Қарағандының «Шахтер» клубын Қазақстан Суперкубогы үшін өткен матчта 1:0 есебімен ұтты. Кездесуде жалғыз допты Данило Неко соқты. Ол ойынның 68-минутында Марат Хайруллиннің әдемі пасын пайдаланып, Мокиннің торына тоғытты. Осы есеп матчтың соңына дейін сақталып қалды. Жалпы, бұл кездесуде «Ақтөбе» қарсыластарына қарағанда әдемі ойын өрнегін көрсетті. Мұны ойынның соңында берген сұхбатында «Шахтердің» бас жаттықтырушысы Виктор Кумыковтың өзі мойындады. Дастан КЕНЖАЛИН, «Егемен Қазақстан».