Жаппай тәртіпсіздік салдарынан астаң-кестең болған Алматыны қайта қалпына келтіру жұмыстары басталды. Сүттей ұйыған тыныштықты сапырған бүлікшілердің басым бөлігі қолға түсті. Қызыл жалынға оранған көліктердің қаңқасы қаладан шығарылып жатыр.
Алматының тыныс-тіршілігі біртіндеп қалпына келмек. Терроризмге қарсы шұғыл әрекет әлі де жалғасуда. Шаһардың кіреберіс қақпаларына қойылған блок-бекеттер кірген-шыққан көліктер мен жеке тұлғаларды жіті тексеруде. Қала комендатурасы таратқан соңғы ақпарға сәйкес лаңкестік, тонау және басқа да қылмыстардың 508 қатысушысы қолға түсті. 22 бірлік атыс қаруы мен 1 412 оқ-дәрі тәркіленді. Блок-бекеттерде 56 адам, 9 күдікті көлік ұсталған. «102» басқару пультіне мыңнан аса хабарлама, комендатураның кол-орталығына азаматтардан жедел әрекет етуді талап ететін 525 дабыл түскен. Бұл ақпараттар күн сайын жаңаруда.
Қала әкімі Бақытжан Сағынтаев шаһар тұрғындарына тыныштық пен батылдық танытып, жағдайды тұрақтандыруға және тәртіп орнатуға ықпал еткені үшін алғыс айтты. Ол Президенттің шұғыл іс-қимылының нәтижесінде елдің күйреуінің алдын алуға қол жеткенін атап өтті.
«Қазақстан бүкіл әлемге елімізді және халқымызды күйрету мүмкін еместігін дәлелдеді. Біз халқымыздың қиын кезеңдерде ұйымшыл болып, жұдырықтай жұмылып әрекет ететініне тағы да көз жеткіздік. Алматылықтарға тәртіпсіздік кезінде бізге көрсеткен көмектері үшін алғыс айтамын», деді Б.Сағынтаев.
Алматының тыныс-тіршілігін қалпына келтіру жөніндегі қалалық штаб тәулік бойы жұмыс істейді. Барлық қызметтер антитеррористік орталықпен тығыз қарым-қатынаста. Қаланың бүкіл аудандарында тазалық жұмыстары жүргізілуде. Көшелерден 200 тоннадан астам қоқыс, аулалардан 1 мың тоннаға жуық қалдық шығарылды. Коммуналдық қызметтер әскери қызметшілер залалсыздандырған аумақтарға кіреді. Қаланы тазарту жұмыстарына құқық қорғау қызметкерлері де атсалысуда. Айта кетсек, орын алған қиын жағдайға қарамастан қаланың тыныс-тіршілігін қамтамасыз ету жүйесі үзіліссіз жұмыс істеді. Халықты сумен жабдықтау, кәріз, газбен жабдықтау, жылу қызметтерінде іркіліс жоқ.
Алматының азық-түлік қауіпсіздігі, өнімдердің тапшылығы біртіндеп ретке келіп жатыр. 80-ге жуық супермаркет, үш ірі азық-түлік базары, 70-ке жуық ЖҚС, 111 дәріхананың есігі қайта ашылды. Үш дәріхана тәулік бойы жұмыс істейді. Автогаз бағасы литріне 70 теңгеге дейін төмендеді. Қабылданып жатқан шаралар қала өмірін біртіндеп қалыпқа келтіруге мүмкіндік берді.
«Тек сабырлық, шыдамдылық пен түсіністік қажет», деген Б.Сағынтаев ТЖ режімінің талаптарын мүлтіксіз сақтау және коменданттық сағатты бұзбау қажеттігін еске салды.
«Болған жағдай бәрімізді қынжылтты. Ару қаламыздың көз алдымызда қирауы қабырғамызды сыздатты. Енді ес жимастай көрініп едік. Шүкір, тіршілік қайта жандана бастады. Бұл оқиға бәрімізге үлкен сабақ болды. Бастапқы күндері жұрт дүкеннен нан таппай сенделгенін көрдік. Осыдан кейін тыныштықтың, тәуелсіздіктің бағасы біздің санамызда одан сайын биіктей түсетіні сөзсіз», дейді қала тұрғыны Ерғанат Қуатбекұлы.
АЛМАТЫ