Қостанай облысында зейнетақы мен жәрдемақы төлемдері тұрғындардың жеке есепшотына өз уақытында келіп түсті.
Еңбек және әлеуметтік қорғау департаментінің өкілдері 6 қаңтарға дейін зейнетақы мен жәрдемақыға қосылған өсімдердің «Қазпошта» мен екінші деңгейлі банктерге аударылғанын, ел көлемінде енгізілген төтенше жағдай тәртібіне қарамастан, аталған санаттағы азаматтарға бөлінетін қаржы аударымдарының кешігуі мүмкін емес екенін айтып отыр.
– Біз өткен желтоқсан айына дейін зейнетақы мен әлеуметтік жәрдемақыларға қосылатын ақша айырмашылығын қайта есептеп, төлемдерді өз уақытында жібердік. Биылдан бастап базалық зейнетақы мөлшері 7 пайызға өсті, – деді департаменттің бөлім бастығы Армангүл Әбдіқадырова.
Мәселен, бұған дейін 144 мың теңге зейнетақы алып келген Қостанай қаласының тұрғыны Мұқтар Бексұлтанов 10 қаңтарда қолына 152 мың теңге тигенін айтты. Зейнеткер мемлекеттің қарияларға қамқорлық көрсетіп отырғанына ризашылық білдірді.
Еңбек және әлеуметтік қорғау департаменті қызметкерлерінің айтуынша, қаңтар айынан бастап өзге де әлеуметтік жәрдемақылар мөлшері 5 пайызға өскен. Сондай-ақ мемлекеттік қызметтерді көрсету ережелеріне енген өзгерістерге сәйкес, мүгедектік мерзімі төтенше жағдайға байланысты автоматты түрде 5 желтоқсаннан 19 қаңтарға дейін ұзартылып отыр. Сондықтан мүгедектік мерзімі аяқталып қалған мүмкіндігі шектеулі жандардың алаңдауына негіз жоқ. Ол кісілер өңірде төтенше жағдай режімі алынып тасталған соң, бұрынғыша қалыпты куәландырудан өтетін болады.
Қостанай облысы