WBC, IBF тұжырымдары бойынша жартылай орта салмақ дәрежесіндегі әлем чемпионы, америкалық Эррол Спенс пен WBA (super) тұжырымы бойынша әлем чемпионы, кубалық Йорденис Угас өзара кездесуде үш белдікті сарапқа салады, деп хабарлайды Egemen.kz.
Бұл туралы Эррол Спенстің өзі әлеуметтік желілер арқылы хабарлады. Боксшы үш белдік үшін өтетін жекпе-жек 16 сәуірге жоспарланғанын атап өтті. Бір сөзбен айтқанда екеуара кездесу Эррол Спенстің территориясында өтеді. Ол Арлингтондағы AT&T Stadium-да бұған дейін екі рет рингке көтерілген болатын.
Жалпы, Эррол Спенс әуесқой рингте жүргенде қазақстандық Олимпиада чемпионы Серік Сәпиевпен әлем чемпионатында кездескен еді. 2011 жылы Әзірбайжан астанасы Баку қаласында өткен жаһандық додада қазақстандық боксшы Спенсті 20:10 есебімен жеңген болатын. Қазіргі таңда тағы бір Олимпиада чемпионы Данияр Елеусінов дәл осы жартылай орта салмақ дәрежесінде бақ сынап жүр. Сәпиевтің әуесқойдағы жеңісті жолын Елеусінов кәсіпқой рингте жалғастырып та қалар...