Асқар Ұзабаевтың «Бақыт» көркем фильмі 72-ші Берлин халықаралық кинофестивалінің (Берлинале) «Панорама» секциясында бас жүлдеге ие болды.
«Панорама» секциясы негізгі конкурстан кейінгі салмақты жүлдеге жатады. Яғни конкурстың қазылар алқасы киноиндустрияның кәсіпқой мамандарынан емес, көрермендерден құралған. Олар картинаны көріп болған соң бірден дауыс береді.
Биыл коронавирусқа байланысты шектеулерге қарамастан, «Панорама» секциясына енген фильмдерді 20 мыңнан астам адам көрген. Кинофестивальдың аталған секциясына 33 елден барлығы 29 картина қатысты.
Тұрмыстық зорлық-зомбылық туралы баяндайтын «Бақыт» фильмі көрермендер мен халықаралық БАҚ тарапынан жылы лебізді көп жинаған еді. Себебі үйдегі озбырлық Қазақстанда ғана емес, барша әлемде өткір мәселеге айналып отыр. Айта кетейік, кинокартина шынайы оқиғаларға негізделіп түсірілген.
Фильмде Қазақстанның шағын қаласында өмір сүріп жатқан отбасы туралы, ұзақ жылдарға созылған тұрмыстық зорлық-зомбылық пен махаббатсыз өмір жайында баяндалады. Күйеуі, әйелі мен олардың бойжеткен қызы – үш негізгі кейіпкер тұрмыстық зорлық-зомбылықтың бар мұңын, ауыртпалығын көрсетеді.
Еске салайық, бұған дейін 72-ші Берлин халықаралық кинофестивалінің Generation (балалар мен жасөспірімдер туралы фильмдер) конкурстық бағдарламасы бас жүлдесін режиссер Фархат Шәріповтің «Схема» фильмі жеңіп алған болатын.