Өңірде ақпанның басынан бері асқынып кеткен қауіпті індет өткен аптада қайтадан бәсеңдей бастады. Мысалы, 1 ақпанда 586 адамнан COVID-19 анықталса, 18 ақпанда бұл көрсеткіш 97-ге дейін түсті. Алайда дәрігерлерді короновирус жұқтырып алып жатқан балалардың әлі де азаймай тұрғаны алаңдатады. 18 ақпанның өзінде 17 баладан КВИ белгілері анықталған.
Өткен апта соңында облыстық коммуникациялық қызмет орталығында санитарлық-эпидемиялық бақылау департаменті бастығының орынбасары Юрий Севостьянов баспасөз жиынын өткізіп, көпшілік көкейіндегі бірқатар мәселенің түйінін тарқатып берді.
«Өңірде «омикрон» штамы бар ма?» деген сауалға Ю.Севостьянов: «Біз науқастардан алынған талдауларды республикалық зертханаларға жібергенбіз. Өкінішке қарай, олардың нәтижесін әлі ала алмай отырмыз. Бірақ соңғы кездері тіркеліп жатқан клиникалық белгілерге қарағанда, өңірде «омикрон» бар деп айтуға болады», деп жауап берді. Департамент өкілі екінші немесе үшінші рет екпе қабылдайтын 50 жастан асқан облыс тұрғындарына Pfizer Comirnaty вакцинасы егілуі мүмкін екенін айтты. Айтуынша, бұл мәселе 17 ақпанда өткен салааралық комиссия отырысында талқыланыпты. «Ревакцинация қабылдайтын мүгедектігі бар азаматтарға да Pfizer Comirnaty вакцинасы егілуі мүмкін. Бірақ ол үшін еліміздің бас мемлекеттік санитарлық дәрігерінің қаулысы шығуы керек», деді Ю.Севостьянов.
Баспасөз жиынында өңірде «Спутник V» және «Спутник Лайт» вакциналарының тапшы екені де айтылды.
– Қазір Денсаулық сақтау министрлігі мен ұлттық орталық бұл вакциналарды сертификаттап жатыр. Сондықтан бізге әзірше екі вакцинаның да келетін күні белгісіз. Ал Қазақстан азаматтары Ресей Федерациясы аумағына ПТР-сіз қашан өте алады деген сауалға келсек, бұған дейін бірнеше рет көтерілген бұл мәселе жақында оң шешім тауып қалуы мүмкін. Бас мемлекеттік санитарлық дәрігердің таяуда қабылданған №9 қаулысында Қазақстанның вакцина паспортын мойындаған елдердің тізімі көрсетілген. Өкінішке қарай, Ресей Федерациясы қазірше бұл тізімде жоқ, – деді Ю.Севостьянов.
Қостанай облысы