Партия атауының Amanat болып өзгеріп жатқанының өзі жақсылықтың нышанындай көрінеді. Бұл – ұлтымыз үшін өте киелі ұғым. Президент айтқандай, егемендігіміз, елдігіміз бен бірлігіміз, кең-байтақ жеріміз – бізге бабалардан жеткен аманат болса, осы аманатқа қиянат жасамай, болашаққа мирас етуіміз керек.
Қазір әлемдегі ахуал өзгеріп жатыр. Осындай аумалы-төкпелі заманда Жаңа Қазақстан құруға жұмыла кірісіп жатырмыз. Халық өзгеріс күтіп отыр. Партияның аты өзгерген соң, заты да өзгереді деп сеніп отыр. Президентіміз өте дұрыс айтты. Партияның жұмысы ашық болуы керек, партия мүшелері халықтың мұңын естуі керек, кері байланыс жасауға тиіс. Жоғарыдан тапсырма күтіп отыратын күн артта қалды.
Енді сайлау кезінде халыққа берген уәделерді іс жүзінде іске асыратын уақыт келді. Президент те берілген уәделер қағаз жүзінде қалмауы тиіс екенін атап көрсетті.
Съезде партия жұмысын модернизациялаудың жеті бағыты аталды. Бұл партияға, оның мүшелеріне жаңа мақсаттар мен нақты міндеттер жүктейді. Заман, уақыт, дәуір өзгеріп, талап жаңарған сәтте әрқайсысымыз ісімізбен елімізді дамытуға үлес қосуымыз қажет.
Қазақстанның Азаматтық альянсының қатарындағы 3 мың ҮЕҰ-ның ұжымдық еңбегі елеулі. Азаматтық қоғам – ҮЕҰ ғана емес, саяси партиялар, этномәдени бірлестіктер, кәсіподақ ұйымдары, діни бірлестіктер, ақпарат құралдары, азаматтық белсенділер. Біз өңірлерде не болып жатқанын, халықты қандай мәселелер толғандыратынын жақсы білеміз.
Бүгінгі таңда қоғамда саяси жаңару туралы үлкен үміт бар. Адамдар өз құқықтарын қорғауға бел буды. Олар өзгерісті күтуде. Бұл жағдайда мемлекеттік органдардың жаңа өмір мен сын-тегеуріндерге бейімделе білуі ерекше маңызды болып отыр.
Белгіленген реформаларды табысты жүзеге асыру үшін азаматтық қоғам күш-жігерді біріктіруге тиіс. Өзара сенім негізінде қоғам мен мемлекетті ортақ мүддеге жұмылдыру өте маңызды.
Бану НҰРҒАЗИЕВА,
«Қазақстанның Азаматтық альянсы» ЗТБ президенті