Мемлекет басшысы Қасым-Жомарт Кемелұлы Тоқаев биылғы Қазақстан халқына Жолдауында тәуелсіздігіміздің ұлы болашағының, Жаңа Қазақстанның жарқын бейнесін айқындайтын келелі мәселелерді ел назарына ұсынды.
Мұны өткеніміздің сабағын саралаған, дамудың жаңа белесіне өтудің жолын көрсеткен тарихи Жолдау деуіміз қажет. Президент ел дамуының халық көңілінен шығатын бағыт-бағдарын қадау-қадау шараларды атап, оны саяси тұрғыдан сенімді түрде нақтылап берді. Қоғамды басқарудың демократиялық жаңашыл үрдісіне батыл қадам басуды жедел жүзеге асырудың маңыздылығына ден қойды. Жоғары өкілдік билікке, сайлау жүйесіне халық сенімінен шығып, беделін арттыратын міндеттерді жүктеді. Ел Президентінің жоғары билікті саяси жағынан реформалаудың қажеттігі пісіп жетілгендігі жөніндегі пайымы халық қолдауын табатыны сөзсіз. Авторитарлық жүйенің қоғамды рухани, әлеуметтік және экономикалық жағынан тоқыратқан келеңсіздіктерінің салдарынан түбегейлі арылмайынша, Қазақ елінің сындарлы болашағы болмайтынын Мемлекет басшысы өзінің Жолдауында бұлтарыссыз айтты. Бұл – халық санасын оятатын, жігерлендіретін сөз.
Елдің жан-жақты дамуының негізі тұтқасы биліктің қана емес, әркімнің өз ісіндегі, ар-ұжданы алдындағы биік жауапкершілігінде деген ой осы Жолдаудың өзегінде ұтымды өрілді. Мемлекетті басқаруда қазақ қоғамының алатын рөлі айрықша айтылды. Бұған Президенттің қоғамдық ой-сананың әлеуетін Ұлттық құрылтай құру мәселесін алға тартуы дәлел.
Қазақ елінің әкімшілік-аумақтық құрылымын жетілдіруге қатысты Жолдауда айтылған Мемлекет басшысының ұсыныстары бүгінгі күннің талабына сай әділеттіліктің салтанат құрғаны деуіміз керек! Атап айтқанда, Алаш рухын алғаш жария еткен, халықтың әдебиеті мен мәдениетінің қасиетті бас ордасы Семей жерін Абай облысы, ел тарихының алтын бесігі, бұрынғы Жезқазған өңірін Ұлытау облысы, байтақ қойнауын айтулы жеті өзен өрнектеген өңірден Жетісу облысының бой көтеретіні – тарихи жаңалық екені даусыз! Халықтан ұсыныс болса, Алматы облысының орталығы болатын Қапшағай қаласының Қонаев атымен аталуы да әбден мүмкін екендігін де Қасым-Жомарт Кемелұлы бүкпесіз айтты. Еліміздің аса күрделі кезеңде, геосаяси қиындықтар анталаған мезгілде даму тұрақтылығын, бірлікті сақтау жолындағы тегеурінді ұстанымы да Жолдау мазмұнында айтылған ақиқат. Президент Тәуелсіздік маған бәрінен де қымбат деген сөзін бүгін де қайталап айтты! Тәуелсіздікті бекемдей түсу жолындағы жаңа бағытымыздан адаспайық, ел тірегі халқымыздың болашағы іргелі істерімізден, ізгілікті ойларымыздан көрініс тапсын дегім келеді.
Мәди АЙЫМБЕТОВ,
жазушы, Халықаралық «Алаш» сыйлығының лауреаты