Санкциядан құтқаратын сайт

«Ресей мен Беларусьқа бірқатар елдің санкция енгізуінен кейін кәсіпкерлер көптеген мәселеге тап болады. Мәселен, белгілі бір өнім немесе банкке санкция енгізілуі мүмкін бе және т.б. Бұл мәселе осы елдерге қазақстандық өнімдерді экспорт­тауда ғана емес, жалпы өзекті болып отыр. Біз бүкіл әлеммен еркін сауда жа­сай­мыз, ал бірыңғай кедендік аймақ жа­ғдайында тауарлар ағыны барынша же­ңіл­детілген. Сондай-ақ Қазақстан арқы­лы Ресей мен Беларуське бағыт­талған тауарлар көптеп келеді. Ен­ді­гі міндетіміз – реэкспорт қаупіне бай­ланыс­ты санкция салған елдердің «ерек­ше наз­арына» түсіп қалмау», деп жазды Сауда және интеграция министрі Бақыт Сұлтанов.

Осы орайда кәсіпкерлерге қолайлы болу үшін Премьер-Министр төраға­лық ететін Жедел штаб бизнеске ар­налған «нұсқаулықты» құру туралы шешім қабылдаған. Ол бойын­ша sanction2022.kz/main сайты ашы­лып отыр. Бұл жерде елдер­дегі геосаяси тәуекелдердің жоғары екенін ескере отырып, Ресей нарығы­нан кетуге шешім қабылдаған халықара­лық ком­паниялардың тізімі де жарияланған.

«Бұл компанияларды Қазақстан­ға тарту туралы мәселеге келсек, Қазақ­станда бизнес ашу және жүргізу үшін жағ­дай­лар посткеңестік кеңістіктегі ең қолай­лылардың бірі болып саналады. Бұл өз кезегінде нақты секторда инвести­циялардың өсуіне және жаңа өндірістердің ашылуына ықпал етеді. Ал бұл – Мемлекет басшысының Үкімет алдына қойған негізгі міндеттерінің бірі. Сондықтан Қазақстанда өз өндірісін ашқысы келетін кез келген компания инвесторлар үшін қолжетімді жеңілдіктердің толық спектрін пайдалана алады», деп түсіндіреді Б.Сұлтанов.

Жаңа сайтта Ресей мен Беларуське қа­тысты салынған санкциялардың то­лық тізімі, ЕО, АҚШ және Ұлыбри­та­ния тарапынан салынған санкция­ларға ұшы­раған тауарлар тізімі, РФ-дан кетуге шешім қабылдаған халықаралық ком­паниялар мен АҚШ-тан Ресейге сәнді тауар­ларды экспорттауға салын­ған ты­йым­дар толығымен жария етілген.