«Егемен Қазақстан» республикалық газеті» акционерлік қоғамы «Қазпошта» акционерлік қоғамымен бірлесіп, 2022 жылға толық жазылушылар арасында ұтыс ойнатқан болатын.
Газетіміздің әлеуметтік желілердегі парақшасында өткен лотерея кезінде батысқазақстандық 5 оқырманымыз да түрлі жүлдеге ие болды. Айта кетерлігі, бұл сайысқа газетімізге толық жазылған оқырмандарымыз автоматты түрде, «Қазпошта» берген тізім бойынша қатысқан еді.
Байқаудың ең бағалы жүлдесі – ұялы телефон Алғабас ауылында тұратын Қошетер Әжимов есімді оқырманымызға жол тартты. Алғабас – былтыр «Egemen Qazaqstan» газетіне ең көп – мың данадан аса жазылған Батыс Қазақстан облысы Ақжайық ауданындағы елді мекен.
Тағы бір бағалы сыйлық – «Egemen Qazaqstan» және «Казахстанская правда» газеттерінің атауы жазылған қабырға сағатын өңірге белгілі азамат, Батыс Қазақстан облысы Жұмыспен қамтуды үйлестіру және әлеуметтік бағдарламалар басқармасының басшысы Альберт Есалиев ұтып алды.
Альберт Темірболатұлы былтыр мерзімді басылымдарға жазылу маусымы кезінде Қазталов ауданының әкімі болатын. Мамандығы тарихшы, еңбек жолын ауыл мұғалімі қызметінен бастаған ол мемлекеттік газет-журналдардың байырғы оқырманы екенін айтады. Соның ішінде «Egemen Qazaqstan» газетін тұрақты жаздырып оқып келе жатқанына 20 жылдан асқан. «Мемлекеттің ұстанымы, Үкіметтің әлеуметтік-экономикалық даму бағыты көрініс табатын ел газетін әрбір мемлекеттік қызметші жаздырып алуға тиіс», дейді ол. Айта кетейік, осындай оң көзқарастың нәтижесінде былтыр Қазталов ауданында 800-ден астам адам газетке жазылған болатын.
«Қазпошта» АҚ Батыс Қазақстан облыстық филиалының жетекшісі Динара Хасанғалиева оқырмандарына бағалы сыйлық таратып, халықты мерзімді басылымға жазылуға ынталандырып отырған «Egemen Qazaqstan» акционерлік қоғамына шынайы алғыс айтты.
«Әсіресе сыйлықтың басым бөлігіне қарапайым ауыл тұрғындары ие болғанына қатты қуандық», дейді Динара Рысқалиқызы.
Газет-журналға жазылу науқанын ұйымшылдықпен өткізген пошта қызметкерлеріне де «Егемен Қазақстан» сериясымен шыққан кітаптар сыйға берілді. Соның ішінде Тайпақ ауылдық пошта бөлімшесінен 30 және одан да көп дана «Егемен Қазақстан» газетіне жаздыруды ұйымдастырғаны үшін К.Мұзафарға «Жүз жылдық жылнама» бестомдығы, 25 адамды газетке жаздырғаны үшін Орал қалалық пошта қызметкері Толқын Керімова Әбіш Кекілбайдың «Дәуір дауысы» жинағы, 15 адамға жазылуды ұйымдастырған Ақжайық ауданы Шабдаржап ауылдық пошта бөлімі қызметкері Р.Саламатова «Жиырма бес жыл: жеңістер мен жемістер» атты кітапқа ие болды.
«Қазпошта» АҚ Батыс Қазақстан облыстық филиалы арқылы батысқазақстандық оқырмандар биылғы алғашқы жартыжылдықта 61 319 түрлі газет-журнал жаздырып алады екен. Дәл қазір екінші жартыжылдыққа да жазылу науқаны басталды. Сүйікті оқырмандарымызды болашақта да бізбен бірге болуға шақырамыз.
Батыс Қазақстан облысы