Елімізде мемлекеттік саясаттың басым бағыттарының бірі – адам құқығының сақталуын қамтамасыз ету.
Былтыр Президент Қасым-Жомарт Тоқаев «Қазақстан Республикасының адам құқықтары саласындағы одан әрі шаралары туралы» Жарлыққа қол қойды, оны іске асыру үшін Үкімет бірінші кезектегі шаралар жоспарын бекітті. Бұл құжаттың қабылдануын халықаралық қауымдастық оң бағалады. Оның ішінде діни заңнаманы ырықтандыру, өлім жазасын жою, әйелдерге қатысты саясат, құқық қорғау және сот жүйелерін жетілдіру, сондай-ақ мүмкіндігі шектеулі жандар үшін жасалатын жағдайлар ерекше атап өтілді. Адам құқықтары саласындағы іс-қимыл жоспарларын кеңейту бойынша қосымша шаралар қабылдау үшін Мемлекет басшысы жақында «Қазақстан Республикасының адам құқықтары саласындағы одан әрі шаралары туралы» 2021 жылғы Жарлығына өзгеріс пен толықтыру енгізу туралы шешім қабылдады.
Осыған сәйкес Үкіметке адам құқықтары мен құқық үстемдігі саласында шаралар жоспарын бекіту тапсырылды. Оған әйелдерге қатысты кемсітушілікті жоюды, мүгедек адамдарға қатысты адам құқықтарын, мигранттар мен азаматтығы жоқ адамдарды және босқындардың құқығын қорғау, қылмыстық сот төрелігі саласында жазаны орындау және азаптау мен қатыгездіктің алдын алу, адам саудасы құрбандарының құқықтарын қамтамасыз ету, БҰҰ органдарымен өзара іс-қимыл тетіктерін жетілдіру тәрізді тапсырмалар берілді. Байқағанымыздай, адам құқықтарын қорғау – Қазақстанның саяси күн тәртібіндегі басым бағыттардың бірі.
31 наурыз күні Қазақстан Республикасы Президентінің жанындағы Адам құқықтары жөніндегі комиссияның еліміздің құқық қорғау органдарының қызметінде адам құқығын сақтаудың өзекті мәселелеріне арналған отырысы өтті. Онда қылмыстық процестің бастапқы сатыларында, сондай-ақ Мемлекет басшысының Жолдауында айтылған нұсқауларды ескере отырып, жабық мекемелерде азаптаудың алдын алу және толығымен жою мәселесі сөз болды.
Мемлекет басшысының бұл Жарлыққа қол қоюы еліміздің саясаты жалпыға бірдей халықаралық стандарттарға сәйкес азаматтардың құқығы мен бостандығын қорғау жөніндегі міндеттемелерді іске асыруға бағытталғанын анық көрсетеді.
Игорь РОГОВ,
Президент жанындағы Адам құқықтары жөніндегі комиссия төрағасы