Өңірде екі айлық санитарлық тазалық шаралары басталды. Осыған орай Қостанайда ұйымдастырылған алғашқы сенбілікте қала көшелері мен саябақтар қар астынан шыққан қоқыстан тазартылып, жүздеген ағаш көшеті отырғызылды. Ал қаладағы триатлон-парктің жанындағы алаңқай енді «Жас отбасылар» аллеясы деп аталатын болды. Бұған дейін ашық жатқан тақыр жерге волонтер жастар, спортшылар, ұстаздар мен экобелсенділер, сондай-ақ он шақты жас отбасы арнайы келіп қайың көшеттерін отырғызды.
Көпшілік тарапынан қолдау тапқан игі бастаманы көтеріп жүрген «Жанашыр бол» қоғамдық қоры екен.
– Бүгін отырғызылған көшеттер тамыры бекіп, бойлап өскенше суарып, күтімге алу жағын біздің еріктілер өз мойындарына алып отыр. Биыл отырғызылған отыз шақты көшет, осындай игі шаралар жиі болып тұрса, жыл сайын көбейіп, алдағы уақытта үлкен саябаққа айналар деген үмітіміз бар. Әсіресе көктемде бас қосып, шаңырақ көтерген жас отбасылар осы жерге келіп екі түп ағаш отырғызуды дәстүрге айналдырады деген ойдамын, – деді қордың төрайымы Сәбина Распекова.
Іс-шараға атсалысқан әрбір отбасы өздері отырғызған қос түп ағаштың жанында естелік суретке түсіп, ағаш өсіп тұрған орынды кейін адаспай тауып алатындай етіп белгі қойып жатты. Былтыр ғана шаңырақ құрған ерлі-зайыпты Руслан Ясменко мен Анна Смирнова үш түп ағаш отырғызыпты.
– Мұндай шараларға алғаш рет қатысып отырмыз. Біріншіден, өзіміздің қоршаған ортаны жасылдандыруға атсалысқанымызға қуанамыз. Екіншіден, келешекте бала-шағамызды осы жерге ертіп келіп, өзіміз отырғызған ағаштарды көрсетіп, оларға өз ісімізді үлгі-өнеге етеміз, – дейді Руслан Ясменко.
Neco қоғамдық қорының жетекшісі Наурызбек Бірмағамбетовтің айтуынша, Жас отбасылар аллеясына келешекте қайыңнан бөлек әр түрлі ағаш көшеттерін отырғызған абзал. Жалпы, биыл облыс аумағын жасылдандыруға 700 млн теңге бөлініп отыр.
Қостанай облысы