Әлімхан – Азия чемпионы!

Жарыс кестесіне сай алғашқы күні сайыстар 5 салмақта өтті. Чемпионатты бірден ширек финалдан бастаған жерлес­теріміздің барлығы да тұсаукесер кездесу­лерінде жеңіске жетіп, жүлделі орындар үшін таласу мүмкіндігіне ие болды. Атап айтсақ, талай байрақты бәсекеде жүлде алған Аманғали Бекболатов (55 кило) үндістандық Аржун Халакуркидің тас-талқанын шығарып, жартылай финалда моңғолиялық Даваабанди Мұңх-Ерденді оңай еңсерді. Әлем чемпионатының екі дүркін жүлдегері, Азия ойындарында үшінші сатыға жайғасқан Мейрамбек Айнағұлов (63 кило) сириялық Ахмад Әл-Нак­далиді сан соқтырса, іле-шала иран­дық Иман Хоссейн Мохаммадиді бас көтертпей ұтты.

Осыдан 5 жыл бұрын Азияда алдына жан салмай, одан бөлек дәл сол жарыста тағы төрт рет жүлдегерлер санатына қосылған Мақсат Ережепов (77 кило) Үндістан өкілі Сажан Сажанды еш қи­налмай ұтқанымен, жапониялық Ко­бай Сакурабаға қарсы сайыста біраз тер төгуіне тура келді. Отандасымыз өте шие­­леністі өткен кездесуде бір ғана ұпай айыр­машылығымен жеңіске жетті. Алып­­­тармен айқасқан Әлімхан Сызды­қовтың да (130 кило) қарқыны қуант­ты. Өзі­нен әлдеқайда еңселі әрі салмақ­тары да зор қырғызстандық Роман Ким мен жапониялық Арата Сононы едәуір ұпай айырмашылығымен ұтқан ол жан­күйер­лердің қошеметіне бөленді. Осы­лайша, төрт балуанымыз шешуші сынға жолдама алса, Нұрсұлтан Тұрсынов (87 кило) жартылай финалда Парсы елінің мықтысы Насер Гасем Әлизадеге жол берді.

Финалда Аманғали Бекболатов (55 ки­ло) жапо­ниялық Ю.Шиотанимен бел­десті. Күн- шығыс елінің өкілі былтыр Ал­матыда өткен Азия чемпионатында алдына жан салмаған еді. Ұланбатырдағы жарысқа да ол өте тамаша бабында келген екен. Бұл бәсекеде Шиотани Бекболатовты 13:2 есе­бімен шаң қаптырып кетті. Ең же­ңіл салмақтың қола медалі Жасурбек Ор­тыкбаев (Өзбекстан) пен Хиокинжин Жеонға (Оңтүстік Корея) бұйырды.

Мейрамбек Айнағұлов Тынар Шаршен­бековпен кездесті. Бұл балуанның да есімі қазақ жанкүйерлеріне жақсы таныс. Осы­дан үш жыл бұрын Қырғызстанның өкілі Нұр-Сұлтандағы әлемдік доданың қола медалі үшін белдесуінде біздің Алмат Кебісбаевтан ұтылған еді. Шаршенбековке қарағанда Айнағұловтың атағы әлдеқайда зор. Бірақ шешуші сайыста Мейрамбек қеңінен көсіле алмай, қарсыласына 0:5 есебімен есе жіберді. 63 кило салмақта Нераж Нераж (Үндістан) бен Иман Хоссейн Мохаммади (Иран) үшінші орынды иеленді.

77 кило салмақтағы Мақсат Ережепов тағы бір «айыр қалпақты» ағайынымыз Акжол Махмудовпен күресті. 23 жастағы қырғыз спортшысының атағы алысқа жайылған. Ол – Токио Олимпиадасы мен Жакартадағы Азия ойындарының күміс жүлдегері, 2018 жылғы Азия чемпионы. 23 сәуірде Мақсат 32 жасқа тол­ғалы отыр. Шешуші айқаста Махму­дов­тың мерейі үстем болды. Есеп – 3:1. Қола ме­дальды Кобай Сакураба (Жапония) мен Әреф Музафар Хабиболлахи (Иран) енші­леді.

Финалда үш балуанымыз да сәт­сіздікке ұшыраған соң Әлімхан Сыздықовтың жолына зор үмітпен қарадық. Оның қар­сыласы да тым азулы еді. Ким Менсок Токио Олимпиадасынан құралақан орал­­ғанымен, есесіне одан басқа да көпте­ген жарыста бұл апайтөстің атой салға­нын жанкүйерлер жақсы біледі. Атап айтсақ, Оңтүстік Кореяның оғланы 2018 жылғы әлем чемпионатында күміс медальды мойны­на ілді, екі рет құрлық біріншілігінде жүлдегерлер санатына қосылып, Азия ойындарында үшінші тұғырға табан тіреді. Десек те, атақты қарсыласынан еш қаймықпаған қазақтың нар тұлғалы жігіті бәсеке басталған бетте оны әрі де, бері де лақтырып, айқын жеңіске қол жеткізді. Әлімхан – Азия чемпионы! Ал Муминжон Абдоллаев (Өзбекстан) пен Роман Ким (Қырғызстан) үшінші орынды иеленді.

87 кило салмақтағы Нұрсұлтан Тұр­сы­нов қола медаль үшін бәсекеде Мэлс Айтбе­ковпен айқасты. Бірінші кезең­де қырғызды бозкілемде шыр айнал­дырып, едәуір ұпай қорын жиған қанда­сымыз одан кейін де өте сауатты қор­ғанып, жеңіс тұғырына көтерілді – 8:2. Екінші қоланы Кумар Сунил (Үндістан) иемденді. Ал Насер Гасем Әлизаде (Иран) мен Жалғасбай Бердімұратовтың (Өзбекстан) арасында өткен шешуші сын алғашқысының пайдасына шешілді.

ТҮЙІН: Осылайша, Азия чемпионатының алғашқы күнін Қазақстанның грек-рим күресі шеберлері 1 алтын, 3 күміс және 1 қола медальмен қорытындылады. Яғни бозкілемге шыққан бес балуаны­мыз да жүлде алды. Алайда дәл қазір қазақ жанкүйерлерін алтын медальдың азды­ғы алаңдатып отыр. Ал онсыз жалпы­командалық есепте үздіктер қатарынан көріну қиынға соғатыны анық. Олай болса, екінші күні өнер көрсететін бес жігіті­міз сол олқылықтың орнын толтырады деген ойдамыз.