Ел тыныштығын күзету – қастерлі міндет. Осы бір абыройлы іске жұмылған ҰҚК Шекара қызметінің сай тасындай жас сарбаздары Отан тыныштығын қорғауға салтанатты түрде ант берді.
ҰҚК Шекара қызметінің Алматы облысы бойынша департаментіне қарасты Қарасай ауданы, Ақжар шағын ауданында орналасқан кәсіби-техникалық және дайындық бөлімінде өткен рәсімге сарбаздардың туыстары қатысты. Бір ерекшелігі, жас жауынгерлер курсынан өтіп жатқан 400-ден астам сарбаз Ант берген шараны бүкіл республика жұртшылығы тікелей көрсетілім арқылы тамашалады.
– Мен өзімнің қаруластарымды берген сертімізге адал болып, табандылықпен, ержүректікпен борышымызды өтеуге шақырамын. Ант қабылдау – баршамыз үшін маңызды күн. Елім дейтін ер болып, қайтпас-қайсар азамат атанып, тепсе темір үзетін әскери өмірдің қиындығы мен ауыртпалығына шыдайтын, кез келген уақытта қолына қару алып, елін қорғауға дайын, туған жерінің шекарасында жүретін сарбаздарға айналамыз, – дейді салтанатты шарада сарбаздар атынан тілек білдірген қатардағы жауынгер Нұрсұлтан Абылай.
Әр сарбаздың өмірінде алтын әріппен жазылып қалуға тиіс айтулы сәтте Шекара басқармасының Жауынгерлік Туы ортаға әкелініп, еліміздің Әнұраны шырқалды. Аталған басқарманың басшысы подполковник Н.Бердібаев сапқа тұрған сарбаздарды атаулы мерекесімен құттықтады.
Рәсімге бұдан бөлек, Алматы облысы бойынша департамент бастығының орынбасары полковник А.Мұналбаев, «Застава тарландары» республикалық қоғамдық бірлестігі Алматы облыстық филиалының төрағасы запастағы полковник Александр Дубов, Ауған соғысының ардагерлері, запастағы полковниктер: Григорий Куликов, Жеңісбек Сүлейменов, Болат Құрамысов, Наурызбай батыр ауданы Қорғаныс істері бойынша департаменті бастығының орынбасары запастағы майор Ержан Алинов, сондай-ақ шекарашы ардагерлер мен Наурызбай ауданы әкімдігінің өкілдері қатысты.