Италияның астанасы – Римде «Үлкен дулыға» санатындағы Ролан Гаррос жарысына соңғы дайындық ретінде ұйымдастырылатын теннисшілердің ірі турнирі өтуде. Ерлер арасындағы жарыстың жүлде қоры 5 415 410 еуроны құраса, әйелдер 2 527 250 еуроны бөліске салып жатыр.
Аталған додаға қатысу үшін осы спорт түрінің барлық серкелері Апеннин түбегін бетке алған екен. Солардың арасында Новак Джокович, Александр Зверев, Рафаэль Надаль, Стефанос Циципас, Каспер Рууд, Андрей Рублев, Марин Чилич және тағы басқа көптеген саңлақтар бар. Өкінішке қарай, Қазақстанның бірінші ракеткасы, АТР тізімінде 40-орында тұрған Александр Бублик әлемдік рейтингте өзінен 12 сатыға төмен жайғасқан америкалық Маркос Гироннан айласын асыра алмады – 6:3, 4:6, 3:6. Есесіне әйелдер арасындағы жарысты жерлестеріміз сәтті бастады. Алғашында Юлия Путинцева словениялық Кая Юванды сан соқтырды – 7:5, 4:6, 7:5. Көп кешікпей Елена Рыбакина ресейлік Элина Аванесяннан басым түсті – 6:4, 7:6.
Екінші кезеңде Путинцева испаниялық Гарбинье Мугурусамен күш сынасса, Рыбакина АҚШ өкілі Лорен Дэвиспен шеберлік байқасады.