Сәуір айында теңге бағамын нығайту үшін Ұлттық қордан 168,3 млн доллар сатылған. Бұл туралы ҚР Ұлттық банкінің төрағасы Ғалымжан Пірматов Үкімет отырысында айтты, деп хабарлайды Egemen.kz.
«Сәуірде жаһандық қаржы нарықтарындағы құбылмалылықтың жалғасуына қарамастан, теңге бағамы 1 АҚШ доллары үшін 445,62 теңгеге дейін немесе 4,6%-ға нығайды. Сәуірде шетел валютасына сұраныстың айтарлықтай азаюы байқалды. Қазақстан қор биржасындағы сауда-саттықтың орташа күндік көлемі 179 млн АҚШ долларынан 92 млн АҚШ долларына дейін азайды. Валюта нарығына квазимемлекеттік сектор субъектілерінің валюталық түсімді сатуға қолдау көрсетті. Олардың көлемі сәуірде шамамен 253,2 млн АҚШ долларын құрады. Республикалық бюджетке берілетін трансферттерді қамтамасыз ету үшін сәуірде Ұлттық қордан 168,3 млн АҚШ доллары сатылды. Ұлттық қордан сатудың үлесі сауда-саттықтың жалпы көлемінің 8,7%-ын құрады», деді Ұлттық банк басшысы.
Ғ. Пірматовтың айтуына қарағанда, ішкі валюта нарығындағы жағдай тұрақталғандықтан Ұлттық банк сәуір айында валюталық интервенцияларды жүргізбеген.
«Қысқа мерзімді перспективада геосаяси жағдайдың белгісіздігінен теңгенің құбылмалылық тәуекелі сақталады. Ұлттық Банк теңгерімсіздіктің жинақталуына жол бермейтін және алтын-валюта резервтерінің сақталуын қамтамасыз ететін еркін бағам режимін ұстануды жалғастырады», деді Ұлттық банк төрағасы.