Кеше Қасым-Жомарт Тоқаев ҰҚШҰ-ның құрылуына 20 жыл толуына орай ұйымдастырылған Мәскеудегі алқалы жиынға қатысты.
Өмірде шынайы ахуалды шынайы күйде қабылдау керек. Өйткені Қазақстанның географиялық тұрғыда орналасуы, көршілерімізбен қарым-қатынас елдің дамуына өз әсерін тигізеді. Көршілік қарым-қатынасымыз Ресей, Қытай, Түрікменстан, Қырғызстан, Өзбекстан секілді елдермен тығыз байланысты. Сондықтан көршімен тату болу қай жағынан да маңызды. Осы орайда, Президентіміздің Ресейге барғанын, көршілес елдермен тату болуға ұмтылуын өте дұрыс қадам деп бағалауға болады.
Мемлекет басшысы Қасым-Жомарт Тоқаев дипломат адам. Кешегі жиын барысында да түсірілген фотоларды қарап отырып, Президентіміздің тап-тұйнақтай, өз ісін адал атқарып, мемлекеттің мүддесін қорғағанын анық аңғарамыз.
ҰҚШҰ бітімгерлік күштері Қазақстанның шақыруы бойынша Қаңтар оқиғасы кезінде келіп, өз миссиясын аяқтағаннан кейін өз елдеріне оралды. Олардың еңбегін Мемлекет басшысы Қасым-Жомарт Тоқаев жоғары бағалады.
Кейбір сыншылар ҰҚШҰ-дан шығу керек деген әңгіме айтып жүр. Меніңше бұл мәселені Президент халықпен ақылдаса отырып шешім қабылдайтыны сөзсіз. Бірақ ең басты мүдде – әлемдегі «тоғызыншы территорияның» аумақтық тұтастығын, елдегі тұрақтылық пен бейбітшілікті сақтау саясатын жалғастыра беру керек.
Қазақстанның көпвекторлы позициясын ұмытпаған жөн. Сол вектордан айнымай, дүние жүзі мемлекеттерімен түзу қарым-қатынасты сақтау басты мақсат. Ал ол бүгінгі саяси аренада оңай жұмыс емес. Президентіміздің Түркияға сапары да Қазақстанның халықаралық саясаттағы ұстанымын айқындауға өз ықпалын тигізетіні сөзсіз. Р.Ердоғанның «Біз бауырларымызды әрқашан да қорғаймыз» деген сөзі де өзгелерге ой салары анық.
Самат НҰРТАЗА,
саясаттанушы