Индустрия және инфрақұрылымдық даму министрі Қайырбек Өскенбаев жеңілдетілген автонесие бағдарламасын жүзеге асыру бойынша қосымша тапсырма берді. Бұл туралы Индустрия және инфрақұрылымдық даму министрлігінің баспасөз хатшысы Жанжігіт Омархан хабарлады, деп жазады Egemen.kz.
«Достар, өздеріңізге мәлім, қазіргі таңда жеңілдетілген автонесие бағдарламасы қоғамда қызу талқыланып жатыр. Қалыптасқан ахуал жайлы Индустрия және инфрақұрылымдық даму министрлігінің басшылығы хабардар. Туындаған мәселеге жан-жақты сараптама жасалып отыр. Министр Қайырбек Өскенбаев жауапты тұлғалар мен мекемелерге аталған жағдайға байланысты түсініктеме беруді және қабылданған шаралар мен шешімдерді жариялауды тапсырды», деді Жанжігіт Омархан.
Сондай-ақ ҚР ИИДМ өз тарапынан бағдарламаның ережесі мен оның іске асуы туралы қажетті базалық мәліметті даярлағанын атап өтті. Бағдарламаны одан әрі жүзеге асыру құқығы «Өнеркәсіпті дамыту қоры» мен автокөлік өндірушілер, ритейлер мен екінші деңгейлі банктерге берілген.
Аталған ұйымдар бекітілген бағдарламаның ережесіне сәйкес жұмыс істейді.