Маңғыстауда 10 білім мекемесінің басшыларына айыппұл салынды, деп хабарлайды Egemen.kz.
Маңғыстау облысында 10 білім ұйымының басшысы кәсіпкерлік қызметпен айналысып, заң бұзушылықтарға жол берді. Әкімшілік құқық бұзушылық кодексінің 154-бабы бойынша іс қозғалып, кінәлілер айыппұл төледі.
Өңірде осы ұқсас құқық бұзушылықтардың алдын алу мақсатында сыбайлас жемқорлыққа қарсы қызметтің Маңғыстау облысы бойынша департаменті білім мекемелерінің басшыларына сыбайлас жемқорлыққа қарсы шектеулерді түсіндірді.
«Сыбайлас жемқорлыққа қарсы іс-қимыл туралы» заңда мемлекеттік лауазымды атқаратын және мемлекеттік функцияларды орындауға уәкілеттік берілген адамдарға кәсіпкерлік қызметпен айналысуға тыйым салынған. Бүгінгі күні мектеп директорларының арасында кәсіпкерлікпен айналысқан тұлғалар анықталып отыр. Сондықтан бүгінгі кездесудің мақсаты - сыбайлас жемқорлыққа қарсы шектеулерді қайта түсіндіру», деді Маңғыстау облысы бойынша Сыбайлас жемқорлыққа қарсы қызмет департаменті превенция басқармасының басшысы Қайрат Бәйгебаев.
Спикер мемлекеттік органдардың басшылары өздеріне бағынысты мекеме басшыларын тағайындау кезінде олардан активтері мен міндеттері туралы декларация қабылдауы шарт екенін айтты.