Түркияның Бурса қаласында түркі мемлекеттерінің адам құқықтары жөніндегі уәкілдері омбудсмендер мен ұлттық құқық қорғау қауымдастығын құру туралы меморандумға қол қойды.
Қауымдастық түркітілдес елдердің тәуелсіз, саяси және коммерциялық емес бірлестігі ретінде құрылды. Жаңа бірлестіктің негізгі міндеттері азаматтардың ұлттық құқық қорғау институттары мен түркітілдес елдердің ұлттық заңнамалары туралы сауатын арттыру, адам құқықтарын қорғау мен дамытуға жәрдемдесу болып табылады.
Қауымдастық ұлттық құқық қорғау мекемелерінің ынтымақтастығын нығайтуға, адам құқықтары саласындағы білімді ілгерілету бойынша бірлескен жобаларды іске асыруға ниетті. Қауымдастық түркі қауымдастықтарымен және ұйымдарымен, омбудсмендердің шетелдік институттарымен, омбудсмендердің халықаралық және өңірлік желілерімен, басқа да халықаралық ұйымдармен адам құқықтарын қорғау және көтермелеу саласында өзара жұмыс істеуге дайын.
Қазақстан Республикасындағы Адам құқықтары жөніндегі уәкіл Эльвира Әзімованың айтуынша, қауымдастыққа қатысу түркі мемлекеттерінің аумағында Қазақстан азаматтарының құқықтарын қорғау жөніндегі ұлттық құқық қорғау мекемесінің әлеуетін кеңейтеді және тұрақты негізде адам құқықтары саласындағы озық тәжірибелермен және заңнамамен алмасуға мүмкіндік береді.
«Қауымдастықты құру біздің күш-жігерімізді дәйекті түрде ілгерілетуге, оның ішінде басқа ұйымдармен серіктестікте жұмыс істеуге мүмкіндік береді. Біздің қауымдастық шеңберіндегі ынтымақтастығымыз адамға, оның құқықтары мен бостандықтарына қызмет етуге бағытталған», деді Э.Әзімова.