Шу стансасындағы Локомотив жөндеу зауыты болашағынан үлкен үміт күттіретін өміршең жобаның бірі. «Қазақстан темір жолы» ҰК» АҚ-тың маңызды өндіріс орнына айналып отырған зауытта соңғы жылдары локомотив жөндеу өндірісімен қатар, Елбасының бастамасымен Қытай мемлекетімен бірлесе ТМ KZ тепловозын құрастыру жобасы қолға алынған.
Қытайлық компаниялармен бірлесе құрастырылған бұл тепловоздарда бірте-бірте қазақстандық үлесті арттырып, шетелдік өнімді жерсіндіру мақсатында зауытта соңғы уақытта ауқымды жұмыстар қолға алынып отырғанын құлағымыз шалып, жуырда атбасын Шу зауытына арнайы бұрдық.
Ат шаптырым кең цехта әлі толық жиналып бітпеген қаз-қатар тізілген үш тепловоздың төңірегінде жұмыс қызу жүріп жатыр.
– Қытайдан сатылып алынып жатқан СКD тепловоздарды құрастыру жұмыстары зауыттағы осы екі үлкен цехта жиналды. Өткен жылы екі ірі тапсырыс беруші «Локомотив-2030» және «Локомотив» АҚ тапсырыстары бойынша мұнда 18 тепловоз құрастырылды. Оның тоғызы толық пайдалануға берілсе, қазір тоғызы бойынша жаңғырту жүріп жатыр. Алғашқы 2012 жылы зауытта бір ғана тепловозды құрастырып, пайдалануға бердік. Ол кезде құрастыру жұмыстарында қазақстандық үлес бар болғаны 5 пайызды құраған болатын. Ал, өткен жылы барлық 18 дана тепловозды құрастыру жұмыстарында қазақстандық үлестің салмағы артып, ол 31,8 пайызды құрады. Ал 2016 жылға қарай оның деңгейін 50 пайызға дейін жеткізуді жоспарлап отырмыз,– деді Шу локомотив жөндеу зауытының директоры Малик Ақжігітов.
Маневрлік тепловоздардың бұрынғы тепловоздардан артықшылығын сұрағанымызда, біріншіден, бұл тепловоздар қозғалыс қауіпсіздігін қамтамасыз етуге негізделген. Машинист кабинасы жұмыс істеуге өте ыңғайлы, таза, шудан мейлінше оқшауландырылған. Машинист алдындағы монитор арқылы барлық әрекетті басқарып отырады. Компьютерге енгізілген бағдарламалық жүйе арқасында машинистің өздігінен жұмыс істеуіне болады. Біз тапсырыс негізінде маневрлік тепловоздарды құрастырамыз. Біздің негізгі тапсырыс берушіміз – «Локомотив» АҚ, одан кейін «Локомотив – 2030» ЖШС. Ал әзірге біз құрастыратын локомотивтерді экспортқа шығару қарастырылмаған. Біздің мамандарымыз жаңа техниканың қыр-сырын меңгеру үшін Қытай зауытында болып, сонда оқып, білімдерін жетілдіріп келді. Сосын зауыттағы әріптестеріне үйретті. Бұл локомотивтердің қуаттылығы 1000 кВт, ал кеңестік тепловоздардікі 800 кВт болатын, дейді кәсіпорын бас инженері Марат Нұрбаев зауытты аралатып жүріп.
Жоғарыдағы тепловоздар толығымен осы зауытта сараптамадан өтіп, содан кейін ғана өндіріске жіберілген. Сондай-ақ, жаңа өндіріс орындарының құрылып, қайта құрылып, ауыс-түйіс болып жатқанымен кәсіпорында еңбек етіп жүрген 986 жұмысшының барлығы дерлік өз жұмыс орнын сақтап, қазір өндіріске енгізіліп жатқан жаңа технологиялармен жұмыс істеуде екен.
Сонымен қатар бүгінгі күні кәсіпорында Магистральдық желі дирекциясының тапсырысымен ауыр жол техникаларын жөндеу игеріліп және жол дистанциялары жұмысшыларына арналған кешендік үйшіктер де дайындалып жатқанын айту керек. Атап айтқанда, зауыт жұмысшылары ағымдағы жылдың алғашқы жартысында жол дистанцияларының вахталық әдіспен еңбек ететін жолшыларына арнап үйшіктердің 15 кешенді жиынтығын пайдалануға бермекші. Ал бұл контейнерлерден жасалып жатқан үйшіктерді құрастыруда қазақстандық үлес 60 пайыздан асып жығылатын көрінеді. Бұл жетістік емес пе? Жалпы, зауытта ауыз толтырып айтарлықтай жаңалық та, жетістік те көбейіп отыр екен.
– Ағымдағы жылдың 1 қаңтарынан бастап зауыттың әлеуеті артып отыр. Яғни кәсіпорында ауыр жол техникаларына күрделі, ағымдағы жөндеу жұмыстары жүргізіліп, сервистік қызмет түрлері ұсынылады. Әзірге, бір жылға 51 ауыр жол техникаларына сервистік қызмет көрсету жұмыстарының келісімшартына қол қойып отырмыз. Астана іргесіндегі Қырқыншы және Шу стансасындағы ПЧМ техникаларын жөндеу мен сервистік-техникалық қызмет көрсетуді де игеріп, жолға қойдық. Атап айтқанда, австриялық және ресейлік жол техникаларына күрделі және ағымдағы жөндеу жұмыстары тек бізде жүргізіледі. Олардың қатарында РМ, Дуомат, Унимат, КВР, ДГС техникалары толық дерлік сервистік қызмет алады. Енді алдағы уақытта ауыр жол техникаларына сервистік қызмет көрсету мерзімін бес жылға дейін ұзартып дайындау ойымызда бар. Оған зауыттың әлеуеті толығымен жетеді, – дейді Малик Мақсотұлы.
Тоғыз жолдың түйіскен торабындағы Шу стансасының байырғы локомотив депосының базасында дүниеге келген жаңа, заманауи өндіріс орнының жылдан-жылға өркен жайып келе жатқан тыныс-тірлігі, бүгінде, міне, осындай.
Ерман ӘБДИЕВ,
журналист.
Жамбыл облысы,
Шу ауданы.
Суретті түсірген автор.