ҚР ҰҚК Қырғызстан және Өзбекстан елдерінің арнаулы қызметтерімен және құқық қорғау органдарымен бірлесіп 30-дан аса есірткіге қарсы операция жүргізді, деп хабарлайды Egemen.kz.
Ведомствоның мәліметінше, есірткі трафигінің 9 халықаралық және 14 өңірлік арнасы жойылған. Синтетикалық есірткі өндіретін 8 ірі жасырын зертхананың жұмысы тоқтатылған.
«Арнайы операциялар барысында есірткі құрылымының 15 қатысушысы ұсталды. Заңсыз айналымнан барлығы 223 кг есірткі, оның ішінде: 90 кг синтетикалық есірткі (270 мың «бір реттік мөлшерге» тең), 85.2 кг марихуана, 14 кг апиын, 4 кг гашиш алынды. Бұдан басқа 800 экстази таблеткасы, 500 түп «голланд» марихуанасы және психотроптық заттарды дайындауға арналған 4 тонна химиялық реагенттер айналымнан шығарылды», делінген хабарламада.
Екі ай ішінде алынған есірткінің «қара нарықтағы» жалпы сомасы 2.3 млрд теңгеден астамға бағаланып отыр. Халықаралық есірткі бизнесіне қарсы іс-қимыл жөніндегі іс-шаралар жалғасып жатыр.