Ел тағдырына қатысты маңызды оқиғадан Ұлттық ұлан әскери қызметшілері де қалыс қалмай, өз дауыстарын берді. Осы уақытта Ұлттық ұланның 100 пайыз жеке құрамы өз дауыстарын берді. Бұл жөнінде әскери ведомствоның баспасөз қызметі хабарлады.
Таңғы сағат 6:00-де 5573 әскери бөліміндегі №226 дауыс беру учаскесіне алғашқылардың бірі болып Ұлттық ұлан Бас қолбасшысы, генерал-майор Еркін Ботақанов келіп, конституциялық референдумге дауыс берді. Осылайша Бас қолбасшы бірінші болып жеке құрамды оң өзгерістерге дауыс беруге бастады.
«Ұлттық ұлан әскері еліміздің тыныштығы мен тұрақтылығына жауапты. Қандай да бір жағдай болмасын құқықтық тәртіп әскерінің жауынгерлері жоғары азаматтық жауапкершілік пен биік патриоттық рухты көрсете білген. Референдум арқылы біз еліміздің оң өзгерістері үшін дауыс береміз. Бүгін әр әскери қызметші Жоғары Бас Қолбасшымыз Қасым-Жомарт Тоқаев ұсынған өзгерістерге белсенді қатысып, қолдау көрсететініне кәміл сенемін», деді генерал-майор Еркін Ботақанов.
Ұлттық ұлан Бас қолбасшысының тәрбие және әлеуметтік-құқықтық жұмыстар бойынша орынбасары, Халық қаһарманы, полковник Қайрат Үмбетовтің айтуынша, әскери бөлімдерде ашылған референдум учаскелерінде дауыс берушілердің белсенділігі өте жоғары болған. Әскери қызметкерлердің жеке құрамы ғана емес, олардың отбасы да саяси науқанға түгел қатысқан.
Дауыс беру заң бойынша таңғы сағат 6:00-де басталды. Референдумға қатысушылардың басым бөлігі – 18-ге енді толған, тұңғыш рет дауыс беру құқығына ие болған жас сарбаздар.
Елорда құрамасы 5573 әскери бөлімінде Отан алдындағы борышын атқарып жатқан қатардағы жауынгер Райымбек Бекежанов та осындай тұңғыш дауыс берушілердің бірі. «Мен тәуелсіз Қазақстанның азаматы ретінде елімізде оң өзгерістердің болғанын қалаймын. Сол үшін бүгін азаматтық парызымды атқарып, дауысымды бердім», дейді жас сарбаз.
Тараз қаласынан шақырылған қатардағы Ерасыл Кәрібоз да алғашқы рет дауыс беруде. Әскери киім кигелі өткен 7 ай ішінде қызметінің қыр-сырын, қоғамдық тәртіптің маңызын, татулық пен ынтымақтың баға жетпес құндылық екенін ұғып қалыпты. «Отанымызда бейбіт өмір мен келісім орнап тұр. Соған мақтанамын!», дейді ол.
«Ұйымшылдықпен өткен дауыс берудің нәтижесін қорытындылап та үлгердік. Бізге қарасты барлық 37 жабық референдум учаскесінде тіркелгендер 100 пайыз дауыс берді. Заң бұзушылықтар тіркелген жоқ. Сағат 12-де толығымен таңдауымызды жасап үлгердік», дейді полковник Қайрат Үмбетов.
Айта кетейік, Ұлттық ұланның әскери бөлімдерде сайлау құқығы бар 13 мыңға аса азамат қызмет етеді.