Елордада жастар еңбек жасақтарының жаңа жұмыс маусымы ашылды. Осыған орай өткен іс-шараға еліміздің әр өңірінен 50-ден аса белсенді қатысты. Олар экологиялық тақырыптарды талқылап, шеберлік сабақтарынан пайдалы ақпарат алды.
«Жасыл ел» жастар еңбек жасақтары – экологиялық жобалар мен мемлекеттік бағдарламаларды жүзеге асыру арқылы жастарды маусымдық жұмысқа орналастыру, қалалар мен елді мекендерді абаттандыру, жастарды патриоттыққа тәрбиелеумен айналысатын қозғалыс.
Іс-шара аясында үш күн бойы экология және әлеуметтік жобалау саласындағы жетекші сарапшылардан нетуоркинг, тренингтер және шеберлік сағаттар, тақырыптық алаңдар ұйымдастырылды. Атап айтсақ, экологиялық жобаларды бизнеске айналдыру туралы «Тұрақты бизнес стратегиясы» атты шеберлік сабақ; әртүрлі сұраныстар бойынша жобаны қалай дұрыс жазу керек, әлеуметтік жобаны құру бойынша қадамдық нұсқаулар, гранттық конкурстарға өтінімдерді дайындау кезіндегі типтік қателер талқыланған «Әлеуметтік жобалау» атты тренингі өтті. Сонымен қатар қазіргі жастар арасында тренд болып жатқан мобилография курсы бойынша «Мобилография негіздері» тренингінде қатысушылар телефон камерасы арқылы суретке, видеоға түсіру шеберлігін үйренді.
«Жасыл ел» жастар еңбек жасақтары республикалық штабы жетекшісінің орынбасары Әлішер Қардашов 2021 жылдан бастап ел бойынша 30 мың жас маусымдық-экологиялық жұмыстарға тартылғанын айтты. Осы жылы да 30 мың жасқа жұмыс беру жоспарланып отыр.
– Бүгінгі іс-шараның негізгі мақсаты ретінде жастардың экологиялық сауатын арттыру көзделіп отыр. Әр облыстың өзіндік ерекшеліктері бар. Мысалы, бір өңір экологиялық акциялар жасаса, басқа бір облыс көбірек тал егеді және оның тиімді жақтарын біледі. Еліміздің барлық облысы арасында экологиялық тәжірибе алмасу үшін осы іс-шараны ұйымдастырдық. Жастарды жаңа жұмыс маусымына дайындап, ерекшеліктерді айту, қабылданып жатқан жаңа жобалар туралы ақпарат беру өте маңызды, – деп түсіндірді Әлішер Қардашов.
Атырау облысындағы «Жасыл ел» жастар еңбек жасақтары штабының менеджері Бекарыс Закария әр өңірден келген менеджерлердің тәжірибелерімен жаңа жобаларды іске асырып жатқанын айтты.
– Бұл іс-шараның жастарға беретін мүмкіндігі өте көп. Себебі өзге өңірде шешілмеген мәселелердің шешімі басқа бір аймақтардан табылып жатты. Мысалы, Ақтөбенің тәжірибесіне сүйеніп қазіргі таңда Павлодардағы экологиялық мәселелердің шешу жолын жүзеге асырып жатырмыз. Енді, өзіміздің өңірдегі табиғат мәселелерін реттеп, жаңа жобаларды қолға алуды ойластырып отырмыз, – деді Бекарыс Закария.
«Жасыл ел» жобасы бойынша жастар тек жазғы каникулда ғана емес, сабақ уақытында да жұмыс істей алады. Мұны Павлодар облыстық штабының менеджері Айбек Ғазиздің тәжірибесінен айқын көруге болады. Бір жыл бұрын сарбаз болып жұмысқа тұрған ол қазір облыстық штаб менеджері ретінде еңбек етеді.
– Алдымен басқалар сияқты, яғни бір ай еңбек етіп, ақшамды алып кетемін, деп ойладым. Бірақ жұмыс барысында осы іске деген қызығушылығым оянып, жұмысымды әрі қарай жалғастырдым. Осы жылдың жаңа еңбек маусымында облыс штабының менеджері болдым. Тәулігіне 8 сағат қызмет етемін. Биыл 11-сыныпты бітірдім. Тек каникул кезінде ғана емес, сабақ уақытында да еңбектеніп, сабағым мен жұмысты бірге алып жүрдім. Таңертең сабаққа барып, түстен кейін жұмысқа үлгеретінмін. Кейде, онлайн құжаттармен әріптестеріме көмек беремін. Болашақта журналист болуды армандаймын, – дейді Айбек Ғазиз.
Аружан НАҒАШБАЙ,
Л.Н.Гумилев атындағы ЕҰУ студенті