Мәдениет және спорт министрлігінің қолдауымен «Бурабай» демалыс орнында көркемдік және білім беру кеңістігі аясында заманауи өнердің халықаралық ART TALK жыл сайынғы ІІ симпозиумының ашылу салтанаты өтті. Аталған іс-шара Ақмола облысының туризмін дамыту мақсатында ұйымдастырылып отыр.
Жоба аясында халықаралық алаңда тәжірибе алмасу үшін жыл сайынғы пленэр мен көрмені өткізу, заманауи өнердің көкейкесті мәселелерін талқылау, сондай-ақ Ұлттық музей қорларын заманауи суретшілердің көркем туындыларымен толықтыру жоспарланған. Симпозиумға Қазақстан, АҚШ, Корея, Өзбекстан және Моңғолия елдерінен 16 суретші қатысып отыр.
Халықаралық ART TALK жобасының ашылуына құттықтау хат жолдаған Мәдениет және спорт министрі Дәурен Абаев аталған симпозиум әлемнің әр түкпірінен келген суретшілерге тәжірибе алмасуға таптырмас мүмкіндік екенін айтқан.
Жобаның биылғы маусымының негізгі тақырыбы жаппай цифрландыру кезеңіндегі ХХІ ғасыр суретшісінің рөліне арналған.
Айта кетейік, халықаралық ART TALK жыл сайынғы ІІ симпозиумы 20 маусымға дейін жалғасады. Ал жабылу салтанаты 21 маусым күні Ұлттық музейде қорытындыланып, суретшілердің жаңа туындыларынан көрме ұйымдастырылады.