Түркістанда биыл екінші рет ұйымдастырылған республикалық «Түркістан дауысы» ән байқауы өз мәресіне жетті. Еліміздің әр өңірінен келген жас әншілер Қазақстан композиторларының және өзі таңдаған шығарманы вокалды-аспаптық ансамбль сүйемелдеуімен орындап шықты.
Шығармашыл дарынды жастарға қолдау көрсету, қазақ музыкасын насихаттау мақсатындағы байқаудың іріктеу кезеңінде 52 үміткер онлайн форматта өтінім білдіріп, оның 17-сі ұйымдастыру комитетінің шешімімен ақтық кезеңге жолдама алған. Дарындар арасында жеңімпазды анықтау қазылар алқасына да оңайға соқпады. Бұл орайда қазылар алқасының төрағасы, Қазақстанның еңбек сіңірген қайраткері, әнші, композитор Медеу Арынбаев қатысушылар дайындығының жоғары деңгейде болғанын, олардың ән таңдауы, дауыс техникасы, сахна шеберліктері мен жауапкершіліктері мықты екендігін атап өтті. Ал танымал композитор Бейбіт Оралұлы: «Маған республикалық байқау ұнады. Қатысушылардың дені ән айтудың нағыз шеберлері деуге болады. Олар тіпті халықаралық байқауларға да тәжірибелері жететін кәсіби музыканттар екендігін дәлелдей түсті», деді.
Сонымен, Алматы облысының қатысушысы Алмагүл Батталиева бас жүлде иегері атанса, 1-орынға Дидар Абдухалық (Шымкент қаласы), Бахтияр Ақылбек (Ақтөбе облысы) лайық деп танылды. Ал 2-орынды Толғанай Пазылақын (Алматы қаласы) мен Арқас Айдарбек (Батыс Қазақстан облысы) иемденсе, 3-орын Эльвира Нургужина (Нұр-Сұлтан қаласы) мен Асыл Жомартовқа (Маңғыстау облысы) және Ернар Амандыққа (Қызылорда облысы) бұйырды. Ал Назрин Мұса (Қарағанды облысы) мен Жанасыл Елубаев (Ұлытау облысы) және Айдана Риза (Қостанай облысы) байқау дипломанттары атанды. Жеңімпаздарға Гран-при кубогынан бөлек, арнайы жүлделер мен дипломдар, бағалы сыйлықтар табысталды.
ТҮРКІСТАН