Тобыл төрінде ту көтерген республикалық додаға еліміздің 14 өңірінен мың жарымнан астам спортшы қатысып жатыр. Олар халық спорты санатына енген қазақ күресі, тоғызқұмалақ, шағын футбол, волейбол, баскетбол, гір спорты, қол күрес және асық атудан сынға түсуде. Бәсекеде ұзын ырғасы 34 медаль сарапқа салынады.
Ұлттық спорт пен бұқаралық маңызы бар спорт түрлерін дамытуды көздейтін дүбірлі жарыстың ашылу рәсімі Тобыл жағалауында Тәуелсіздіктің 25 жылдығы саябағында орналасқан амфитеатрда өтті.
Салтанатты іс-шараға арнайы келіп қатысқан Дене шынықтыру және спорт комитетінің төрағасы Самат Ералиев биыл жетінші рет өтіп жатқан байрақты бәсекеге қатысушыларды атаулы спорт мерекесімен құттықтап, жарыста сәттілік тіледі.
– Төрт жылда бір айналып келетін халық спорты ойындары өңірлерде жыл басынан бері жүріп жатыр. Бұл жарыстарда әр аймақтың үздік спортшылары анықталды. Енді, міне, сол сыннан сүрінбей өткен саңлақтар финалдық бәсекеге жиналып отыр. Халық спорты ойындары олимпиада секілді жоғары деңгейдегі дүбірлі дода деп ойлаймын. Мемлекет басшысы Қасым-Жомарт Тоқаев әр Жолдауында бұқара мен жасөспірімдер спортына өте зор мән беріп отырады. Олай болса, бұл бәсеке спорттағы биік белестерге бастайтын баспалдақ болғай. Бізге осындай мерекені ұйымдастырып берген Қостанай облысының әкімдігіне және облыстық дене шынықтыру және спорт басқармасына алғыс айтамын, – деді комитет төрағасы.
Ұйымдастырушылардың мәліметінше, халық спорты ойындарына әр аймақтан 100 шақты спортшы келген. Ресми құттықтаулардан кейін өңір өнерпаздары спортшылардың құрметіне ән мен күйден, жыр мен биден шашу шашты.
Салтанатты іс-шара барысында Самат Ералиев Францияның Нормандия провинциясында өткен ХІХ әлемдік гимназияда ел қоржынына олжа салған қостанайлық үш спортшыға, атап айтқанда, баттерфляйдан чемпион болып оралған Дмитрий Энеске, регбиден қола жүлдегерлер Виктория Кузнецова мен Марина Денисоваларға Мәдениет және спорт министрлігінің марапатын табыс етті.
Қостанай облысы