Құландылық жас кәсіпкер ауылда тұрып-ақ кәсібін дөңгелетіп, ұлттық құндылықтарды қастерлеудің заманауи үлгісін көрсетіп отыр.
Қарақия ауданына қарасты Құланды ауылында тұратын Даниял Төлеуіш ұлттық тағамдарды сапалы дайындап, көркем етіп қаптап-орап сатуға шығарумен өз кәсібін дамытуда. Қатырған секер, ірімшік, құрт, балқаймақ, ірімшік рафаэлло және тағы да басқа сүт өнімдері бар ұлттық брендтегі тәттілер әдемі қаптамамен облыс орталығындағы дүкен сөрелерінде және Ақтау халықаралық әуежайы кафетерийінде сатылымға шықты.
Бір жыл бұрын түйе және сиыр сүтінен таза табиғи өнім даярлап, отбасылық шағын бизнеспен айналыса бастаған Даниял Төлеуіш арнайы сауын аппараттарын алып кәсібін ұлғайтқан. Отбасы мүшелерінен бөлек маркетингпен, өнімді сатумен, жарнамалық контентпен айналысатын мамандар алып, төрт адамды жұмыспен қамтып отыр.
Қазіргі таңда құландылық жас кәсіпкердің Aq dám табиғи таза сүт өнімдеріне сұраныс жоғары екен.
Мал сүтінен дайындалған ұлттық тағамдардың денсаулыққа пайдасы қашанда зор. Сондықтан ол тұрғындар үшін де, туристер үшін де сұранысқа ие өнім болмақ.
Маңғыстау облысы