Биыл Нұр-Сұлтанда қала күніне орай отшашу болмайды, деп хабарлайды Egemen.kz қала әкімдігіне сілтеме жасап.
Қаланың 24 жылдығына орай концерттер мен түрлі спорттық фестивальдер өткізіледі.
Астана күнінде қалада бірқатар әлеуметтік нысандардың (кезекте тұрғандарға пәтер кілттерін тапсыру), зауыттың, скверлердің, қоғамдық кеңістіктердің, 80-нен астам аула аумақтарының ашылуы өтеді.
Сондай-ақ осы күнге орай қаланың бірқатар ведомстволық бағынысты ұйымдары концерттер, спорттық турнирлер, көрмелер ұйымдастырады.
1-6 шілде аралығында «Атамекен» этно-мемориалдық кешенінде «Елорда пейзаждары» атты арт-көрме жұмыс істейді.
1-8 шілде аралығында – «Ел тірегі – Елорда» көрмесі өтеді.
Бүгін, 5 шілде күні «Әлем картасындағы жаңа елорда» ашық есік күні өтеді.
4-6 шілде аралығында Орталық саябақта «Mereke Street» қалалық мәдениет фестивалі өтеді.
5 шілде күні сағат 19:00-де филармонияның концерт залында «Әзіл әлемі» әзіл кеші ұйымдастырылады.
Сондай-ақ бүгін «Астана Опера» опера және балет театры «Шопениана» және «Шехрезада» күміс дәуірінің балеттерін ұсынады.
5 және 6 шілдеде «Колизей» спорт кеңістігінде «Отан Ана» монументінің жанында стритболдан «Nur Sultan Cup» турнирі ұйымдастырылады.
5-9 шілде аралығында «Астана Балет» театры «Орфей және Эвридика» балетінің премьерасына шақырады.
6 шілдеде сағат 11:00-де Триатлон паркте «Elorda Tolqyny» спорттық жарысы басталады. Осы уақытта «Қазанат» ипподромында шабандоздар «Елорда кубогы» үшін бәйге түрлерінен бақ сынайды.
Кешке, сағат 21:00-де Амфитеатр сахнасында Ұлықпан Жолдасов «Ақ қанат-ақ құсым» бағдарламасымен өнер көрсетеді. Сағат 18:00-ден 22:00-ге дейін «Астана-Арена» стадионының тұрағында дәстүрлі Open air «Халықпен бірге» өтеді.
Сол күні кешке «Қазақстан» ОКЗ «Дос-Мұқасан» ансамблінің шығармашылығына арналған «Далам менің» концерті ұйымдастырылады.
8 шілдеде Амфитеатрда «Мен сені сүйемін, менің астанам» атты концерттік қойылым өтеді.
Айта кетсек, «Барыс Арена» мұз сарайының жанында 12 сағаттық Open air «You Fest» шарасын өткізу 20 шілдеге ауыстырылды.