Рыбакина – финалда!

Лондонда өтіп жатқан «Үлкен дулыға» санатындағы «Уимблдон» турнирінде Елена Рыбакина әуелі жарыс­тың жартылай финалына жолдама алып, қазақстандық теннисшілер ара­сында осындай тарихи межені бағын­дырған тұңғыш спортшы атанған еді. Жарыстың 17-ракеткасы болып тіркел­ген қазақстандық теннисші ширек финалда дүниежүзілік рейтингте 44-орында тұрған аустралиялық Айла Томля­новичтен үш сетте басым түсті.

Екі сағатқа созылған бәсе­кенің бірінші партиясында аустралиялық теннисші ә дегеннен есепте алға шығып, сол қарқынын партия соңына дейін сақтай алды – 6:4.

Тез ес жиып үлгерген Елена Рыбакина екінші сетте қарсыласынан есе қайтарды – 6:2. Ал үшінші, шешуші партия­да да қазақстандық спортшы өз мықтылығын дәлелдеп, қарсыласына еш мүмкіндік қалдырмады – 6:3. Матч барысында Е.Рыбакина 15 эйс жасап, 9 брейк-пойнт­­тың бесеуін ұтымды пай­да­ланды.

Сөйтіп, жерлесіміз финалға шығу үшін әлемнің 18-ракеткасы, «Үлкен дулыға» жарысының екі мәрте жеңім­пазы румыниялық Симоне Халеппен кез­десті. Екі теннисші де бір-бірінің қыр-сырын өте жақсы біледі. Себебі бұған дейін теннисшілер кортта үш мәр­те кездесіп, екеуінде Халеп, біреуінде Рыбакина жеңіске жеткен. Бұл матч отан­дасымыз үшін карьерасындағы ең маңызды ойынның бірі болды.

Ойын жерлесіміздің бірден брэйк жасауымен басталды да, ол бірінші партия аяқталғанша осы басымдығын қарсыласына берген жоқ – 6:3. Екінші сет те Е.Рыбакинаның бірден брэйк жасауымен басталғанымен, бұл жолы С.Халеп таразы басын теңестіре алды. Алайда қарсыласының бұл қадамы отандасымыздың сағын сындыра алған жоқ. Іле-шала есе қайтарған Елена тағы да екі гейм алға шықты да осы басымдығын сет аяқталғанша ұстап тұрды. Қорытынды есеп – 6:3, 6:3.

Осылайша, Елена Рыбакина өзінің спорттық мансабындағы алғашқы үлкен жетістігіне қол жеткізді. Жалпы, бұл оның жеке ғана табысы емес, тұтас Қазақстан теннисінің осындай деңгейдегі алғашқы жетістігі болып отырғанын ерекше атап көрсеткен жөн.