ҚР Энергетика министрі Болат Ақшолақов Үкімет отырысында «Оңтүстік» энергия аймағының электр желілерін күшейтудің техникалық-экономикалық негіздемесі әзірленіп жатқанын мәлімдеді, деп хабарлайды Egemen.kz.
«Қазіргі уақытта Ұлттық электр желілерін жаңғырту жұмысы жүргізілуде. Оның ішінде Батыс энергия аймағы электр желілерін күшейту бойынша құрылыс-монтаждау жұмыстарын 2023 жылы аяқтау жоспарланып отыр», деді министр.
Ол, сондай-ақ Оңтүстік энергия аймағының электр жүйелерін күшейту бойынша техникалық-экономикалық негіздеме әзірленіп жатқанын жеткізді.
«Негіздеме дайын болғаннан кейін жобаны іске асырудың параметрлері мен мерзімдері айқындалады», деді Болат Ақшолақов.
Еске сала кетсек, кеше Үкіметтің кеңейтілген отырысында Мемлекет басшысы Қасым-Жомарт Тоқаев Оңтүстік және Батыс аймақтардың электр желісін күшейту жұмыстары жеткіліксіз қарқынмен жүргізіліп жатқанына ескерту жасаған еді.