Бас прокуратурада активтерді қайтару жөніндегі комиссияның отырысы өтті. Отырыс барысында Алматыдағы ең ірі көтерме сауда нарығын мемлекетке қайтару жоспарланып отырғаны белгілі болды, деп хабарлайды Egemen.kz.
«Алматыда олигополиялардың бірінің ірі көтерме сауда нүктесіндегі үлесі бес есе төмен бағамен (нарықтық құны - 1,5 млрд бола тұра 307 млн теңгеге сатылды) сатылғаны анықталды», делінген ҚР Бас прокуратурасының баспасөз қызметі таратқан хабарламада.
Комиссияда нақтыланғандай, 2022 жылғы шілдеде мәмілені бұзу және объектіні мемлекетке қайтару мақсатында талап-арыз енгізілген.
Сондай-ақ 2019 жылы «Салтанат үйі» ЖШС атына 601 млн теңге мөлшерінде төмендетілген құны бойынша объект сатылғаны анықталды, ал нысанның нарықтық бағасы 3 млрд теңгені құрайды.