Коронавирус батыста күрт көбейді

Ақжайық өңірінде эпидемия­лық жағдай алаңдатарлық. Өңірде коро­на­­вируспен сырқаттанушылық деңгейі өткен айлармен салыстырғанда күрт өсіп кеткен.

– Шілде айының басынан бері об­лыста коронавирус инфекциясын жұқ­т­ырудың 207 жағдайы тіркелді. Оның 164-і – симптомды, 43-і – симптомсыз. Өткен аймен салыстырғанда аурушаңдық деңгейі 99,1%-ға өсті. Маусым айында мұндай науқас небә­рі төртеу болатын, – дейді Арман Талғатұлы.

Жалпы, өңірде жыл басынан бері коро­навирус диагнозымен 9 797 адам дәрігерге қаралған. Ал пандемия бас­тал­ға­лы бері осы дертке шалдық­қан­дардың саны 50 мыңға (49 794) жуықтапты.

Бас дәрігердің айтуынша, коронавирус бойынша инфекциялық стационарға түскендер саны да күннен-күнге артып келеді. Мәселен, шілде айының алғашқы жартысында инфекциялық стационарларда жалғыз науқас болса, арада бір апта өткенде науқас саны 33-ке жетіп, өсім 97 пайызды құраған.

Әрине, дәрігерлер төтенше жағ­дай­дың алдын алуға тырысып жатыр. Өткен жылдардың тәжірибесі текке кетпеді. Қазірдің өзінде вирус жұқ­тыр­ған балаларға, жүкті әйелдерге медициналық көмек көрсету мақсатында облыстық перинаталдық орталықтан, қалалық көпбейінді аурухананың босан­дыру бөлімінен және облыстық көп­бейінді балалар ауруханасынан ин­фек­циялық 32 төсектік орын әзірленген.

Жалпы, облыс бойынша қазіргі таңда 222 инфекциялық төсек дайын болса, ол жерде 33 науқас ем алуда. Әзірге дерті асқынып, реанимация бөліміне түскен науқас жоқ. 165 адам амбу­ла­тор­лық дең­гей­де ем алуда.

– Коронавирус инфекциясына қарсы күрестің ең тиімді әрі сенімді жолы – вак­циналау. Дәл қазір Батыс Қазақстан облысында PFIZER компаниясының Comirnaty вакцинасының 1 500-ге жуық дозасы, қытайлық Vero CellComirnaty вак­цинасының 50 мыңға жуық және отан­дық QazVac вакцинасының 12 мың­дай дозасы бар. Өзіңіз білесіз, PFIZER компаниясының Comirnaty және Sinopharm компаниясының Vero Cell вак­циналарын Дүниежүзілік ден­сау­лық сақтау ұйымы мақұлдаған, – дейді А.Қалибеков.

Статистикалық деректерге сүйенсек, облыста коронавирусқа қарсы вакци­на­ның І компонентін – 278 186 адам, ІІ компонентін – 269 729 адам алған екен. Бұл белгіленген жоспардың 65-67 па­йызы ғана.

Бүгінде облыс бойынша Pfizer ком­па­ниясының «Комирнати» вакцинасын 20 215 адам алды. Оның ішінде 456-сы жүкті әйелдер, 5291-і бала емізетін әйел­дер, 6511-і жасөспірімдер, 16-сы мүге­дектік тобы бар және 7 941 басқа санат­тағы адамдар. Облыс бойынша барлығы 102 792 адам ревакциналаудан (51,3%), 6 443 адам қайта ревакциналаудан (42,3 %) өткен.

Жақында республикалық ведомство­ара­лық комиссия елдегі коронавирус инфекциясы бойынша эпидемиялық ахуалды талқылаған еді. Осы жиында көтерілген бір мәселе ревакциналау бо­латын. Қазақстан бойынша Батыс Қазақ­стан облысы 15-орында тұр. «Бұл айтар­лықтай төмен көрсеткіш», дейді об­лыстық денсаулық сақтау басқар­ма­сы­ның басшысы.

Денсаулық сақтау министрлігінің ақпаратына қарасақ, ауырғандардың 89%-ы – вакцина алмағандар не вакцина алғанынан кейін 6 айдан астам уақыт өткен адамдар екен. Халық арасында ұжымдық иммунитет қалыптасуы үшін де ревакциналау деңгейі 65 пайыз­дан кем болмауы қажет. Сондықтан маман­дар бұрын екпе алған жандарды қайтадан вакцина алуға шақырып жатыр.

Қалыптасқан жағдайға байланысты бүгінде облыстың барлық емханасында маска режімі, фильтр-кабинеті мен мобильді бригадалар жұмысы қалпына келтірілді. COVID-19 таралуын болдырмау және эпидемиялық ахуалды одан әрі нашарлатпау мақсатында эпидемияға қарсы шаралар енгізіліп жатыр. Әсіресе көпшілік орындарда әлеуметтік ара­қа­шық­тықты сақтап, мүмкіндігінше адам көп жиналатын жерлерге бармау туралы кеңес берілуде. Әуе және темір жол көліктерінде, халықаралық автобустарда және жабық ғимараттарда маска тағу ұсынылған.

Батыс Қазақстан облысы