Екіжылдық үзілістен кейін «Саламатты Қазақстан» медициналық пойызы өңірдегі шалғай жатқан стансаларды аралап, тұрғындарды дәрігерлік тексеруден өткізуде. Биыл ақ желеңділер Павлодар облысында тоғыз елді мекенде аялдап, ауыл тұрғындарына кәсіби медициналық көмек көрсетпек.
«Саламатты Қазақстан» мамандандырылған медициналық пойызы Павлодар облысының шалғайдағы стансалары мен оларға жақын орналасқан елді мекендердің халқын медициналық тексеруден өткізуде. Дәрігерлік қызмет ақысыз, пұлсыз көрсетіледі. Пойыз 31 шілде күні Май разъезінде аялдаса, одан әрі Жұмыскер, Көктөбе, Құркөлді бетке алды. Май ауданының халқын қарап біткен соң Шарбақты өңіріне бағытын бұрып, одан әрі Ақсудың бірқатар ауылын аралайды деп жоспарланған. Соңғы аялдама – Шідерті стансасы.
2010 жылдан бері жалғасып келе жатқан медициналық пойыздар қайырымдылық жобалары аясында ұйымдастырылады. Жалпы, еліміз бойынша мұндай пойыздың екі бірдей бағыты бар. Оның бірі – «Жәрдем» пойызы мамыр айының соңынан бері жұмыс істеп жатса, «Саламатты Қазақстан» пойызы 20 маусым күні Алматы облысының Байсерке стансасынан қозғалып, бүгінде біздің өңірге жетіп отырған жайы бар.
«Саламатты Қазақстан» пойызының жетекшісі Аман Қасеновтің айтуынша, жылжымалы медициналық құрам алғашқы медициналық-санитарлық және консультативтік-диагностикалық көмек көрсетуге бағытталған.
– Пойызда 24 білікті дәрігер бар. Барлығы Алматы қаласындағы танымал клиникаларда істейтін білікті мамандар. Ақ желеңділер зертханалық әдістерді қолдана отырып, ауыл тұрғындарын дәрігерлік тексерістен өткізеді. Қажет болған жағдайда шағын операция жүргізіп, емханасы жоқ шалғай ауылдардың тұрғындарын жақын жердегі емдеу мекемелеріне жолдамамен бағыттай аламыз. Мұнда терапевт, педиатр, кардиолог, невропатолог, көз, лор дәрігері, гинеколог, хирург, уролог, маммолог және тіс дәрігері барын атап өткен жөн. Биыл білікті мамандардың қатары психолог және дерматовенерологпен толықты. Денсаулық пойызы пандемияға байланысты соңғы екі жылда ұйымдастырылмай қалғаны мәлім. Биыл қайта жанданғаны ауыл халқын қуантып отыр. Қабылдауымызға келген жұртшылық ризашылығын айтуда, – дейді пойыз басшысы.
Кешенде қажет болған жағдайда кеңейтілген жалпы және биохимиялық талдаулар, рентгенография мен флюрография, ішкі ағзалар мен тамырлардың УДЗ-зерттеулерін, электрокардиограмма, гастрофиброскопия және диагностикалық зерттеулердің басқа да түрлерін жүргізуге мүмкіндік бар. Биыл стамотологиялық құрылғылар жаңартылып, ауыл тұрғындарының тістерін бүтіндеуде бұрынғыдан да сапалы қызмет көрсету мүмкін болып отыр.
Бұған дейін Абай облысын аралап келген дәрігерлердің ақпаратына сүйенсек, ауыл адамдары гинеколог, жүрек және тіс дәрігерлерінің көмегіне жиі жүгінеді. УДЗ-зерттеуге де кезек қалыптасып қалады екен. Май ауылының тұрғыны, зейнеткер Мақпуза Бейсекенова аяқ-қолы жиі қақсап, бел-омыртқа жүйесі ауыратынын айтады. Мұнда ол жалпы тәжірибе дәрігерінің көмегіне жүгініп, хирургтің ақыл-кеңесін алды.
Алғашқы күні Май стансасына тоқтаған пойызға Ақжар, Қаратерек және Май ауылдық округтерінің тұрғындары қаралып, дәрігерлік тексеруден өткен. Май ауданының ішкі саясат және тілдерді дамыту бөлімінің басшысы Жайрангүл Рахманбергенованың сөзінше, бұл үш аумақта 2 мыңға жуық адам тұрады. Жергілікті халық араға екі жыл салып жалғасын тапқан медициналық пойыздың жұмысына көңілдері толатынын айтты.
«Саламатты Қазақстан» кешенінің дәрігерлері 2 қарашаға дейін еліміз бойынша 67 стансаны аралап, жалпы саны 60 мың адамды қамтымақ ойлары бар. Павлодар облысынан соң пойыз Нұр-Сұлтан қаласына, одан әрі Көкшетау, Қостанай, Қарағанды, Ұлытау өңірлеріне аттанбақ.
Жобаны «Samruk-Kazyna Trust» әлеуметтік жобаларды дамыту қоры Денсаулық сақтау министрлігінің қатысуымен, «Қазақстан темір жолы» ҰК» АҚ жанындағы «Әлеуметтік жобалар қоры» корпоративтік қорымен бірлесіп іске асырып жатқанын айтып өтейік.
Мұрат ҚАПАНҰЛЫ,
журналист
Павлодар облысы,
Май ауданы