Күн сайын Алматы ауруханаларына түрлі кеселдермен науқастар түсіп жатады. Ақ желеңді мамандардан шипа тапқан мыңдаған адам күн сайын алғысын айтып, отбасына оралады. Алайда олардың арасында айрықша оқиғалар да бар. Мәселен, мегаполистегі №1 қалалық клиникалық аурухананың Амбулаторлық хирургия орталығында шағын оталар жасалғанымен, желкесінде липома бар 73-тегі зейнеткерге жасалған операцияның жөні бөлек. Пациент желкесіндегі ісік жиырма жыл бұрын пайда болған.
«Томпайып көзге қораш көрінетіні болмаса еш ауырған жоқ. Бұрын түрлі себептермен операция жасата алмай жүрдім. Жақында таныстардан ісікті міндетті әлеуметтік медициналық сақтандыру есебінен тегін жасатуға болатынын естіп, ауруханаға бардым», дейді зейнеткер.
Пациентке амбулатория деңгейінде жоспарлы операция жасалды. Операция жасалатын жерді жансыздандыру арқылы жасалған шағын хирургиялық манипуляция бар болғаны 20 минутқа созылған. Қазір операция орнында білінер-білінбес тыртық қалды.
Амбулаторлық хирургия орталығының жетекшісі Марат Менаяқов операция жасау үшін белгілі бір анализдер мен тексеру нәтижелері талап етілетінін айтады. Қажетті сараптамалардан кейін пациентке бірден операция жасалады. Яғни ол үшін ауруханаға жатып емделудің қажеті жоқ.
«Пациенттің мойнындағы ісіктен биопсия алынды. Нәтижесінде, оның майдан түзілген липома екені анықталды. Жалпы, мұндай ісіктерге операция жасалғаннан кейін пациент бірнеше сағаттан соң үйіне қайтады. Содан соң екі күнде бір рет жарасын таңдыруға келіп тұрады. Тігістің жібі 10-12 күннен кейін алынады», дейді хирург.
Алайда мамандар оның әртүрлі факторлар салдарынан қатерлі ісікке айналып кетуі әбден мүмкін екенін жоққа шығармайды. Сондықтан мұндай ісіктерді дер кезінде алып тастаған жөн.
Ал №1 қалалық клиникалық аурухана жанындағы Амбулаторлық хирургия орталығында ашылғалы бері өткен айда осыған ұқсас 20 шақты шағын операция жасалды. Хирургиялық көмек міндетті әлеуметтік медициналық сақтандыру шеңберінде және ақылы негізде көрсетіледі. Хирургтер липома, атерома, гигрома сынды тағы да басқа қауіпсіз ісік түрлеріне, шаптағы және кіндік тұсындағы жарықтарға операция жасайды, варикозды емдейді.
«Амбулаторлық хирургия орталықтары көпшілікке өте ыңғайлы. Пациент мұндай орталықтарда операция жасату үшін аса көп анализ тапсырмайды. Оның үстіне, сақтандырылған азаматтар тиісті сараптамаларды тіркелген емхана арқылы тапсырып, инструменталдық зерттеулерден де МӘМС шеңберінде өте алады», дейді Медициналық сақтандыру қорының Алматы қалалық филиалы директоры Тілеухан Әбілдаев.
АЛМАТЫ