«Астана Опера» сахнасында өнер көрсетіп, елордалықтарды жылы әсерге бөлеген Қарағанды академиялық музыкалық комедия театрының әртістері мен музыканттары гастрольдік сапарын қорытындылады.
– Біз өзіміздің әріптестік ынтымақтастығымызға қуаныштымыз, өйткені осындай өнер байланысы, ең алдымен көрермендерге оң ықпалын тигізеді, – деген «Астана Опера» театрының директоры, Қазақстанның еңбек сіңірген қайраткері Ғалым Ахмедияров екі өнер ордасы арасындағы тәлімді тәжірибе бас шаһардың мәдени өмірін көркейтіп, одан сайын байыта түсетіндігін жеткізді.
Айта кетейік, Қарағанды академиялық музыкалық комедия театры республикамыздағы оперетта мен мюзикл жанрындағы бірден-бір өнер ордасы саналады. Жыл сайын онда жетіге жуық жаңа қойылымдар сахналанғанымен, жалпы театр репертуарында 200-ден астам спектакль бар.
Кенді өлкенің абыройын асырып жүрген театрдың жетекшісі, Қазақстанның еңбек сіңірген қайраткері Амантай Ибраев «Астана Операдағы» өнер сапары қарағандылық театрдың әртістері мен музыканттары үшін айтулы оқиға болғандығын атап өтті.
– Біздің ұжым еліміздегі бірегей театрдың сахнасында көрсетуге репертуарымыздағы үздік деген спектакльдерді алып келді. Оның ішінде әлемге танымал композиторлардың бірі В.Баскиннің жаңа шығармасы, бродвей мюзиклінің дәстүрлі желісімен жазылған «Кентервиль қамалының елесін», сондай-ақ театрымыздың негізін құрайтын классика – И.Кальманның «Цирк ханшайымын», М.Дунаевскийдің «Алқызыл желкендерін» және т.б. туындыларды қойып, көрермендердің жақсы бағасын алдық, – деді А. Ибраев.
Аталған музыкалық театрдың елордалықтар көңілінен шыққан қойылымдардың қоюшы дирижері, Беларусь музыкалық театрынан арнайы келген қонақ Николай Макаревич гастрольдік сапардың өте жоғары деңгейде өткендігін айтты.
– Бұл гастрольдің мен үшін орны бөлек. Әсіресе «Астана Опера» залы мен фойесінің әдемілігі ұнады. Өзім Еуропаның көптеген театрын, соның ішінде әйгілі Вена опера театрын көрдім. Сонда да маған осы өнер ордасындағы дизайнерлер мен суретшілердің шебер жұмысы таңғалдырды. Үш спектакльдің декорациясын бұзбай, сол күйінде сақтауға болатын сахнаның техникалық жабдықталуы мен акустикасы керемет балет залы да көңілімнен шықты. Мен оны «Метрополитен Опера» және «Ла Скаламен» қатар қояр едім, – дейді Минсктен келген маэстро.