Елімізде ұйымдастырылған VIII Халықаралық армия ойындары аяқталды. Он күн бойы сарбаздар түрлі тактикалық сайыста өзара кіл мықтыны анықтады. Жүлдегерлер Қарулы Күштердің Ұлттық әскери-патриоттық орталығында марапатталды.
Биыл армия ойындарына отандық сарбаздармен қатар, Әзербайжан, Армения, Беларусь, Венесуэла, Иран, Вьетнам, Зимбабве, Қытай, Қырғызстан, Мали, Ресей, Тәжікстан және Өзбекстан Қарулы Күштерінің өкілдері қатысуға ниет білдіріпті. Салтанатты ашылу салтанатында Зимбабве сарбаздарының сахнаға шығып, билеген сәті есте қалған еді. Ал нағыз айқаста кім үздік шықты екен?
«Артиллериялық атыс шеберлері», «Тактикалық атқыш», «Меридиан» конкурстары Жамбыл, Қарағанды, Ақмола облыстарындағы үш оқу-жаттығу полигонында өтті. Үшеуінде де жарыс қожайындары – Қазақстанның әскери қызметшілері жеңіске жетті.
«Артиллериялық атыс шеберлері» сайысында Ресейдің әскери қызметшілері екінші орынды иеленсе, үшінші орынға Әзербайжанның артиллеристері тұрақтады. «Тактикалық атқыш» сайысында екінші сатыға Қытай командасы жайғасса, үшінші орынды Өзбекстан мен Ресей құрамалары өзара бөлісті. «Меридиан» сайысында қытайлықтар күміспен күптелсе, Өзбекстан мен Беларусь командаларына үшінші орын бұйырды.
Жарыс жеңімпаздары мен жүлдегерлері медальдармен және дипломдармен марапатталды. Сонымен қатар әр конкурста жеке номинациялар бойынша жеңімпаз атанғандарға да арнайы марапаттар табысталды. Марапаттау шарасына Қорғаныс министрінің бірінші орынбасары – Қарулы Күштері Бас штабының басшысы, генерал-лейтенант Марат Құсайынов қатысып, жыл сайынғы халықаралық әскери-спорттық жарыстардың әскери қызметшілердің жауынгерлік даярлығы мен шеберлігін жетілдірудегі маңызы зор екенін атап өтті.
Соңғы жылдары халықаралық армия ойындарын өткізуде өзіндік игі дәстүр қалыптасты. Ойындар шеңберінде қатысушы елдердің әскери қызметшілері қарым-қабілетін шыңдап, тәжірибе алмасу арқылы кәсіби деңгейін арттыра түсуде. Жалпы, XXI ғасыр армиясының негізгі мақсаты әлемнің әр түкпірінде бейбітшілікті сақтау екені сөзсіз. Оның үстіне әскери сарапшылар халықаралық ойындарды әскери дипломатияның жаңа белесі деп санайды. Өйткені әскери-спорттық алаңдарда танысып, өзара бәсекеге түсетін қатардағы әскери қызметшілердің достық қарым-қатынасы әрдайым жоғары бағаланып келеді.