«Бақпасаң бала кетеді...» деген бұрынғының сөзінің мәні жойылған жоқ. Яғни тәрбие мен білімнің нәрін қанып ішпеген өскелең ұрпақтың өмір өткеліндегі бұралаң сәттері жиілей беретіні белгілі. Өкінішке қарай, елімізде балалар мен жасөспірімдер арасындағы қылмыс оқиғалары азаймай отыр.
Мұндай жаман әдеттен Алматы облысының жас тұрғындары да ада емес екен. Дерекке жүгінсек, жыл басынан бері кәмелетке толмағандардың қатысумен жасалған қылмыс саны 64-ке жетіпті. Былтыр мұндай 46 оқиға тіркелген екен. Яғни тәртіпсіздік пен тентектік үлесі артқан. Осы қылмыстарға талдау жасаған құқық қорғаушылар биыл Қарасай ауданында тәртіп бұзу дерегі көбейгенін айтады, өткен алты айда 29 оқиға тіркелген. Ал Жамбылда – 13 оқиға, Талғар ауданында – 9 жағдай және Еңбекшіқазақ ауданында 8 дерек анықталыпты.
Тағы бір қаралы хабарды да жасырып қалуға болмас. Аймақта өткен алты айда 7 бала өз-өзіне қол жұмсап, өмірмен қоштасқан көрінеді. Қыршыннан қиылған жеті жас ғұмырдың екеуі Еңбекшіқазақ ауданында, екеуі Ұйғыр ауданында тұрған болса, Жамбыл, Іле және Қарасай аудандарында бір-бір оқиғадан тіркелген екен. Ал өзіне қол салуға оқталған 11 бала құтқарылыпты.
Өкінішке қарай, жол апатынан зардап шеккен бала саны да артып отыр. Жыл басынан бері жасөспірімдердің қатысуымен 207 жол апаты болып, 9 бала қаза болған. Тағы 300 бала әртүрлі дене жарақатын алды.
– Балалар жолда жүру ережесін сіз бен бізден үйренеді. Балалар үлкендердің жүріс-тұрысының жақсы жағын да, жаман жағын да қабылдайды. Көп жағдайда балалар жолда жарақат алып, түрлі жағдайға ұшырап жататыны көлік жүргізушілерінің ғана кінәсінен емес, ол көбінесе балалардың жол жүру ережесін білмегендігінен де болады. Балаларға жолда жүру ережелерін үйретіп, үнемі оған үлгі көрсетіп және жүріс-тұрысын қадағалап, балаларды көшеде болатын қауіпті жағдайлардан сақтандыру әрбір ата-ананың міндеті, – дейді Алматы облыстық әкімшілік полиция басқармасының бастығы Нұрлан Ысқақов.
Алматы облысы