Биылғы жылғы ерлер арасындағы боксшылардың Азия чемпионатын Иорданияның астанасы – Амман қабылдайды. Бұл ақпарат Азия бокс конфедерациясының ресми сайтында жарияланды.
Дәл осы жарыс осыдан дәл тоғыз жыл бұрын Амманда ұйымдастырылған болатын. Сол біріншілікте сарапқа салынған 10 бас жүлденің жетеуін олжалаған жерлестеріміз жалпы командалық есепте жеке-дара көш бастаған еді. Атап айтсақ, Теміртас Жүсіпов (49 кило), Берік Әбдірахманов (60 кило), Мерей Ақшалов (64 кило), Данияр Елеусінов (69 кило), Жәнібек Әлімханұлы (75 кило), Антон Пинчук (91 кило) және Иван Дычко (+91 кило) қарсылас шақ келтірмеді. Одан бөлек, финалда өзбекстандық Ойбек Мамазулуновқа есе жіберген Әділбек Ниязымбетов (81 кило) күміс медальды мойнына ілді. Енді жерлестеріміз бұл жолы да сол нәтижені қайталайды деп үміттенеміз.