Әйелдер арасында бокстан Польшаның Гливице қаласында Silesian Open деп аталатын халықаралық турнир басталды. Бұл жарыста Қазақстанның былғары қолғап шеберлері де бақ сынауда.
Алғашқы күні төрт боксшымыз шаршы алаңға шығып, солардың үшеуі жеңіске жетті. Атап айтсақ, ел чемпионы Аида Әбікеева (63 кило) польшалық Виктория Хасты қапы қалдырды. Әлем чемпионатының үш дүркін жүлдегері, Азия чемпионы Жайна Шекербекова (54 кило) финляндиялық Вилма Витайненің осал тұсын оңай тапты. Жастар арасындағы әлем біріншілігінің жеңімпазы Балауса Мұздиманның (54 кило) швециялық Зехра Миллиден мерейі үстем болды. Ал Әнел Сақыш (54 кило) таиландтық Джутамас Джутпонттан жеңіліп қалды.
Енді алдағы күндері Карина Ибрагимова, Назым Қызайбай, Римма Волосенко, Мәдина Нұршаева, Ләззат Күнгейбаева, Валентина Хальзова, Алуа Балқыбекова, Гүлсая Ержан, Балжан Асқар, Сәния Сұлтанқызы, Жазира Орақбаева және Айдана Забынбекова рингке көтеріледі.