Атыраудағы Ғ.Сланов атындағы облыстық ғылыми-әмбебап кітапханада Сарайшық туралы жаңа кітаптың таныстырылымы өтті. Қазақстан Жазушылар және Журналистер одағының мүшесі, «Қазақстан-Zaman» газетінің бас редакторы Ертай Айғалиұлының «Сарайшық ханшасы және Иван Грозный» атты кітабы «Таймас» баспа үйінен 1000 данамен жарық көрген.
«Сарайшық ханшасы және Иван Грозный» атты қос желілі тарихи романда тарихымыздың терең қойнауында қалған Сарайшық қаласының сол кездегі (ІХ-ХVI ғасырларда) өмір тынысы мен тіршілігі, өркендеу мен гүлдену дәуірі және күйреуін аңыздық мифологиялық кейіпкер Аққу ханша және басқа да тарихи тұлғалар арқылы шынайы суреттедім. 1581 жылы әлемдегі ең сұлу қалалардың бірі, Ноғай ордасы мен Қазақ хандығының астанасы болған Сарайшықты орыс патшасы Иван Грозный қираттырады. Бейбіт қаланың тұрғындарын, байлығын тонайды. Қосарлы желіде Аягүл бастаған балалар қаланың тарихын зерттейді және өлі қаланың Жайық өзеніне жұтылып кетпеуі үшін күрес жүргізеді. Романның тартысты да, шытырман оқиғалары жас оқырмандарды ғана қызықтырмайды, тарихи-танымдық тұрғыда айтылған мәселелер аға буынның да назарын аударары сөзсіз», – деді кітап авторы.
Жолдасбек ШӨПЕҒҰЛ,
«Егемен Қазақстан».
Атырау облысы.