Осылай деп жалған ақпарат тарататындар азаймай тұр. Мұны еріккеннің ермегі екенін іштей сезсе де, құқық қорғау органдары ғимаратты тексеруге міндетті. Өзге де құзырлы мекемелер аяғынан тік тұрады. Соңында еріккендердің аяғы көктен келеді.
ІІМ Экстремизмге қарсы іс-қимыл департаменті бастығының орынбасары, полиция полковнигі Дархан Разуевтің айтуынша, соңғы уақытта Астана мен Алматы қалаларында, сондай-ақ еліміздің кейбір өңірлерінде ірі сауда-ойын сауық орталықтары, әуежайлар, мектептер, сот ғимараттары белгісіз адамдар тарапынан анонимді шабуылға ұшыраған.
– Құқық қорғау органдары кез келген нысанды миналау туралы ақпарат келіп түскен кезде нақты қауіптің қатерін бағалай отырып әрекет етеді. Барлық келіп түскен қауіп-қатерлер бойынша шұғыл қызметтер міндетті түрде оқиға орнына барады, объектілерге егжей-тегжей тексерулер жүргізеді, жарылғыш құрылғыларды іздейді және оның салдарын болдырмау үшін кезек күттірмейтін шараларды қабылдайды. Құқық қорғау органдары қауіптілік туындайтын аймақтан адамдарды эвакуациялауға міндетті. Бұл өз кезегінде адамдардың жоспарларын бұзады және өмірдің үйренішті жағдайына кедергі келтіреді. Барлық жағдайда жарылғыш зат қойылғаны туралы ақпарат расталмай жатады. Қылмыскердің қылмыс жасау себебі әртүрлі болуы мүмкін: кек алу, бұзақылық, өзіне назар аударту. Ойланбай жасаған әрекеті үшін кәмелет жасына толған адамға қылмыстық жаза қарастырылғанын естен шығармаған жөн, – дейді Дархан Разуев.
Әрине, еріккендер көп ұзамай қолға түседі. Себебі ішкі істер органдарының иелігінде соңғы үлгідегі техникалық қондырғылар бар. «Телефон терроризмі» фактілеріне тосқауыл қойылды десек те, соңғы уақытта интернет желілерінің электрондық пошталары арқылы жалған хабарламалар тарату жиілеп кеткен. Осыған байланысты Ішкі істер министрлігі мүдделі мемлекеттік органдармен бірлесе отырып, арнайы топ құрған. Мамандар тобының қызметі шетелдік әріптестермен, сондай-ақ компаниялармен ІР-мекенжайларды, аккаунттарды және электрондық мекенжайлармен байланысты басқа да деректерді анықтау бойынша өзара әрекет етуге бағытталған.
Жалпы аталған қылмыс бойынша биыл 8 айда сотқа 14 қылмыстық іс жолданып, 13 адамға сот үкімі шығарылған. Олардың жетеуі бас бостандығынан айырылып, төрт адам бас бостандығын шектеу жазасына тартылған. Бір азаматқа қатысты мәжбүрлі медициналық шара қабылданды.
Елімізде аталған қылмысты жасағаны үшін бес мың айлық есептік көрсеткіш мөлшерінде айыппұл (бүгінде 15,9 млн теңге) салу немесе түзету жұмысына тарту, сондай-ақ бес жылға дейінгі мерзімде бас бостандығынан шектеу немесе айыру жазасына тарту көзделгенін атап өткен жөн. Қылмыстық жауапкершілік 14 жастан басталады. Соттың шешіміне сәйкес, осындай хабарламаның салдарынан келтірілген залалдың барлық шығыны өтеледі. Мұндай іс-әрекетті кәмелетке толмағандар жасаған жағдайда шығындарды өтеу олардың ата-аналарына немесе заңды өкілдеріне жүктеледі.