Аустралияның Вуллонгонг қаласында тас жолдағы велоспорттан әлем чемпионаты аяқталды. Бәсекенің соңғы күнін ересектер 266,9 шақырымдық жарыспен қорытындылады.
Бұл сында бельгиялық Ремко Эвенепул алдына жан салмады. Ұлттық құрама көшбасшысы Алексей Луценко мәреге 35 шақырым қалғанда негізгі топтан қара үзіп, Ремко Эвенепулдың соңына түскен еді. Алайда соңғы сәтте оларды пелетон қуып жетіп, Алексей мәреге небәрі 24-ші болып жетті. Ол жеңімпаздан 2 минут 21 секунд қалып қойды. Қазақстан құрамасының өзге өкілдері Вадим Пронский мен Юрий Натаров мәреге жете алмады.
Биылғы додада қазақстандық велошабандоздар 1 алтын медаль олжалап, жалпыкомандалық есепте Жаңа Зеландиямен бірге 8-орынды бөлісті. Жалғыз жүлдені 23 жасқа дейінгі велоспортшылар арасындағы сында Евгений Федоров жеңіп алды. Ақтөбенің тумасы 170 шақырымды 3 сағат 57 минут
8 секундта басып өтіп, ешкімге дес бермеген еді. Аустралиядағы әлем чемпионатында 13 мемлекеттің қоржынына жүлде түсті.