Астанада кеше «КАDEX-2014» халықаралық қару-жарақ пен әскери-техникалық мүлік көрмесі ашылды. Ол 25 мамырға дейін жалғасады. Көрмеге әлемнің 27 елінен 300 компания өкілдері, 54 ресми делегация қатысуда.
Көрменің ашылу салтанатына Мемлекеттік хатшы Әділбек Жақсыбеков, Премьер-Министрдің орынбасары Бақытжан Сағынтаев, Қорғаныс министрі Серік Ахметов, әскербасылар, депутаттар, қазақстандық әскери-техникалық мүліктер шығаратын компаниялар басшылары, журналистер қатысты.
Үшінші рет өткізілгелі отырған бұл көрмеге әлемдік қару-жарақ өндірушілер тарапынан қызығушылық артып отыр. Бұған 27 ел өкілдерінің қатысып отырғаны дәлел. Олардың бәрі де Қазақстан қорғаныс өнеркәсібі кешеніне ден қойып, отандық өнімдерімізге көңіл аударуда. Көрмеге шығарылған отандық 80 компанияның да өнімдері қонақтардың қызығушылығын тудыратынына әскери мамандар сенімді. Соның ішінде биыл тұңғыш рет көрмеге шығарылып отырған отандық аэроғарыш өнеркәсібі өнімдерінің үлгілері де мамандарды селқос қалдырмас деген үміт бар.
Жалпы, биылғы «КАDEХ-2014» көрмесінің өзінің алдында болғандардан айырмашылығы көп. Үшінші көрме ғарыштық технологиялар, авиациялық қару-жарақ, әуе шабуылына қарсы қолданылатын қорғаныс жүйелері, ІТ-технология, байланыс жүйелері мен құралдары, әскерді тылдық және техникалық қамтамасыз ету секцияларының артуымен ерекшеленеді.
«КАDEX-2014» көрмесіне алыс-жақын шетелдердің әскери-өнеркәсіп кешенінің өнімдері де көптеп шығарылған.
Тутұғырға «КАDEX-2014» жалауы ілінгеннен кейін көрме ашық деп жарияланды. Одан кейін Қазақстан Республикасының Мемлекеттік әнұраны орындалды. Осыдан әрі жиналғандарға қазақстандық қару-жарақтардың мүмкіндіктері мен қуаты паш етілетін қойылым көрсетілді. Соның ішінде, әсіресе, авиацияның барлық түрлерінің пилотаж топтарының өнерлері көрермендерді селқос қалдырмады. Сондай-ақ, «танк вальсі» деген ойын түрі көрсетіліп, танкистер де өздерінің осал еместіктерін айғақтады.
Ең алдымен арнаулы әскери күштер содырларды тез жою ойындарын көрсетті. Белгіленген уақытта қорғаныс шебіне жатып үлгерген арнаулы топқа тікұшақпен қосымша күштер көмекке келіп, мұздай қаруланған содырларды аз уақыттың ішінде «жойып» жіберді.
Әскери ойындар көрсетіліп болған соң лауазым иелері мен қонақтар арнайы алаңға тұрғызылған және павильонда орналастырылған қару-жарақтар мен әскери техникаларды аралап шықты. Осы күні Қорғаныс министрі С.Ахметов көрмеге қатысушы бірнеше шетелдік компаниялар басшыларымен екіжақты келіссөздер жүргізді.
Жалпы, отандық қорғаныс саласы үшін «КАDEX» перспективалық жобаларды іске асыруға, қазіргі заманғы жүйелерге қол жеткізуге, технологиялық жаңа деңгейлерге көтерілуге мүмкіндік беретін алаң болып табылады. Көрменің маңызды бөлігін іскерлік және әріптестік туралы келіссөздер құрайды. 2012 жылы болған екінші «КАDEX» көрмесінде «Қазақстан Инжиниринг» ұлттық компаниясы ғана әлемдік озық компаниялармен 2020 жылға дейінгі аралықта құны 1,5 млрд. долларға тең болатын жобаларды бірлесіп іске асыру туралы келісімшартқа қол қойған еді.
Сонымен қатар, көрме барысында бірқатар шаралар ұйымдастырылады.Оларға қатысушылар қазіргі заманғы әскери-техникалық саясаттың өзекті мәселелерін, қарулы күштерді материалдық-техникалық тұрғыдан қамтамасыз ету, қару-жарақ пен әскери-техникалық мүліктерді өндіру, жөндеу, жаңғырту бойынша өзара іс-қимылдың перспективаларын талқылайды.
Жақсыбай САМРАТ,
«Егемен Қазақстан».