Астанада тұңғыш рет «Орталық Азия-Ресей» форматында аймақтық ынтымақтастық пен ортақ мүддені ілгерілету мәселелері кең көлемде талқыланды. Қазақстан астанасында жұма күні өткен жиынға Ресей, Қырғызстан, Тәжікстан, Түрікменстан мен Өзбекстан президенттері келді.
«Қауіпсіздікті қамтамасыз етудегі басты жауапкершілікті негізге ала отырып, біз терроризм мен экстремизмге, заңсыз көші-қонға, есірткінің заңсыз өндірісі мен айналымына қарсы тұруға бағытталған алтыжақты ынтымақтастық пен ақпарат алмасуды ынталандыруды жалғастырамыз», делінген саммит қорытындысы бойынша жарияланған бірлескен мәлімдемеде.
Ресей мен Орталық Азия елдері де Тәуелсіз Мемлекеттер Достастығы (ТМД) аясында орыс тілін қолдау және насихаттау мақсатында халықаралық ұйымның құрылуын құптады. Мәлімдемеде сондай-ақ елдер «тараптардың мүдделерін ескере отырып, ұлттық валюталармен есеп айырысу тәжірибесін кеңейтуге ниетті» делінген.
Саммитте сөз сөйлеген Ресей президенті Владимир Путин елінің Орталық Азия елдерімен тауар айналымы екі есеге өсіп, 37,1 миллиард долларға жеткенін айтты. «Орталық Азия-Ресей» саммиті Қазақстан Президенті Қасым-Жомарт Тоқаевтың жетекшілігімен Астанада өткен түрлі шаралар аясында тұңғыш рет ұйымдастырылды. Оның алдында Астанада Тоқаевтың төрағалығымен ТМД мемлекет басшыларының саммиті өтті.