Жаңа кен орындары іске қосылды

Одан өндірілетін хром кенінің жалпы жоспарланған көлемі шамамен – 600 мың тонна. Жоба компанияның шағын кен орындарын дамыту бағдарламасына кіреді. Бағдарлама ферроқорытпа зауыттарына шикізатты тұрақты жеткізуді қамтамасыз етіп, негізгі өндірістік қуатты ұстап тұруға мүмкіндік береді.

«Геофизикалық-9» – соңғы екі жылда ашылған үшінші кеніш. Кен игеруге кіріспес бұрын кеншілер 4,8 млн текше аршылым жұмыстарын орындайды.

– Геологиялық қызмет бұрын анықталған кен ошақ­тарына тыңғылықты барлау жүргізіп жатыр. Бұл – болашақтағы жұмыс. Ком­панияның шағын кен орындарын дамыту бағдар­ламасы өндірістік қуатты сақтауға, тұтастай алғанда 2022 жылдан 2026 жылға дейінгі аралықта өндірістік көрсеткіштерді арттыру­ға мүмкіндік береді, – дейді Дөң тау-кен байыту комбинатының директоры Азамат Бектібаев.

Жаңа кен орны ашық әдіспен игеріледі. Аршылым және игеру жұмыстарын Дөң тау-кен байыту комбина­ты – «Дөң» кенішінің қызмет­керлері өз күшімен атқарады.

Тағы екі кен орны – «Геофизикалық-11» және «Июньское» дайындық үстінде. Миллион тоннадан астам кен қоры бар «Геологиялық-1» игеріліп жатыр. Бірінші кезеңде, осы жыл­дың жазында мұнда 617 мың тонна кен өндірілді. Екінші кезеңінде жерасты қорлары игеріледі. Бұл жерден тағы 413 мың тонна шикі­зат алу жоспарланып отыр.

Дөң тау-кен байыту комбинаты «Оңтүстік» кенішінің жерасты қорлары да игері­ліп жатыр. Сонымен қатар тағы екі шағын кен орны №39 және «Геофизикалық-7»-ге құжаттар дайындалу үстінде. 

– Олар жерасты әдісімен игерілетін болады. Айта кету керек, Хромтау ауданындағы ауқымды геологиялық барлау жұмыстары 2016 жылдан бас­тап жүргізіліп келеді. 2025 жылға дейін кезең-кезеңімен жүзеге асыру жоспарланып отыр. Геологиялық бар­лау­дың негізгі міндеті – Кем­пірсай сілемін зерттеу кезінде хром кендерінің шала зерттелген орындарын қайта бағалау және жаңаларын іздеу. Бұл ретте геологиялық деректерді өңдеудің заманауи технологиялары және объектілерді модельдеу құ­ралдары қолданылады, – дейді шағын кен орындары бойынша жоба жетекшісі Виталий Гусаров.