Алматадағы Кардиология және ішкі аурулар ғылыми-зерттеу институтына Израильдің Тель-Авив Эндокринология, метаболикалық аурулар және диабетология институтының басшысы, профессор Евгений Мошкович келді. Эндокринология саласының білгір сарапшысы осы сапарында еліміздің әр аймағынан келген эндокринологтер үшін «Эндокринология саласындағы диагностика мен емдеудің заманауи стандарттары» шеберлік дәрісін өткізді.
«Эндокринология, әсіресе қант диабеті қазір жаһандық тұрғыдағы өзекті мәселелер қатарында. Қай елде болсын қант диабетімен ауыратындардың көрсеткіші көтеріліп барады. Бүкіл әлемде оның зардабын 530 млн-нан астам адам көріп отыр. Шамамен бұл жер бетіндегі 20-79 жас аралығындағы тұрғындардың 10%-ын құрайды», деді КІАҒЗИ басқарма төрайымы Роза Қуанышбекова.
Бұл – бірінші кезекте, адамзаттың өмір салтының түбегейлі өзгеруінен туындап отырған мәселе. Статистикалық мәліметтерге сәйкес, балалар мен жасөспірімдер арасында да қант диабетінің асқынуынан болатын өлім-жітім көбейген. 2025 жылға қарай қант диабетіне шалдыққан науқастардың саны 2 есеге артады деген болжам жасалып отыр. Қант диабеті – соқырлық, бүйрек жеткіліксіздігі және инфаркт пен инсультке душар ететін негізгі кеселдердің бірі.
«Мемлекеттер арасындағы тәжірибе алмасу мамандардың бір-бірінен озық тәжірибелерді үйренуге мүмкіндік береді. Қазақстанда дәрігерлерді оқытуға және қант диабетімен ауыратын науқастарды әлемдік стандарттарға сәйкес емдеуге мүмкіндік беретін озық медициналық препараттармен қамтамасыз етуге қаражат бөлінеді», дейді Е.Мошкович.
Кардиология және ішкі аурулар ҒЗИ эндокринология кафедрасының меңгерушісі Лаура Даньярова Денсаулық сақтау министрлігінің Диспансерлік науқастардың электрондық тіркелімінің деректеріне сәйкес, Қазақстанда қант диабетімен ауыратын 400 мыңнан астам науқас тіркелгенін мәлімдеді. Науқастардың басым көпшілігінде, яғни 95%-ында 2 типті қант диабеті жасы мен өмір салтына немесе басқа да қауіп факторларына байланысты пайда болған ауру. Маман диабеталды ауруын анықтаудың да маңызын атап өтті.
Ақтау қаласынан келген эндокринолог Сәуле Уразалина аталған семинардың қант диабетін, әсіресе балалар мен жасөспірімдердегі ауруды емдеу, алдын алу, сондай-ақ медициналық-санитарлық алғашқы көмекті ұйымдастыру ісі талай мәселені шешуге септесетініне сенімді.
Шеберлік дәрісінен өтуге келген дәрігерлер эндокринология кафедрасының бөлімшесін аралап, күрделі клиникалық жағдайларды талқылады.
Эндокринологиядағы диагностика мен емдеудің заманауи тәсілдерін меңгеруге жиналған Астана, Ақтау, Ақтөбе, Атырау, Семей, Тараз, Шымкент, Алматы қалаларының эндокринологтері «БМСК деңгейінде 2 типті қант диабетінің алғашқы профилактикасы», «Жүрек-қан тамырлары патологиясы және қант диабетінен зардап шегетін пациенттерді бақылауда ұстаудың проактивті тәсілі», «Бүйрек үсті безінің жеткіліксіздігі», «Қалқанша безінің гипофункциясы және жүктілік», «Гипертиреоз және жүктілік», «Остеопороз: диагностика мен емдеудің заманауи тәсілдері» сияқты тақырыптарды талқылады.
АЛМАТЫ