Кеше облыс орталығындағы «Шахмат үйінде» өңірлік «Saryarqa samaly» газетінің жүлдесі үшін тоғызқұмалақтан XIV республикалық турнир жалауын көтерді. Еліміздің 10 аймағынан жиналған 300-ден астам ойыншы екі күн бойы өзара мықтыларды анықтайды.
Дода осымен 14-інші мәрте өтуде. 300-ден астам ойыншы жеңістен дәмелі болып келіп отыр. Биыл турнир жылдағыдай жас ерекшеліктері бойынша 5 топқа жіктеліп, ер және қыз балалар арасында өтуде. Республиканың 10 облысынан қатысушылар келіп, жарыстың көрігін қыздыруда. Солардың арасында Батыс Қазақстан, Қостанай, Жетісу, Абай, Ұлытау, Шығыс Қазақстан, Ақтөбе, Ақмола, Қарағанды облыстарынан және өзіміздің Павлодар өңірінің аудан-қалаларынан спортшылар бақ сынауда.
– Шынын айтайық, газетіміздің дәстүрлі турниріне деген қызығушылық жоғары деңгейде. Биылғы жарысқа 8 спорт шебері, 30 спорт шеберлігіне кандидат, одан бөлек, әртүрлі санаттағы спортшылар қатысып, ақыл-ой жылдамдығымен жарысуда. Жыл сайын кемі 300-400 спортшы турнирге қатысады. Бәсекені өткізудегі негізгі мақсатымыз – тоғызқұмалақтың бұқара арасында кеңінен танылып, онымен шұғылданушылар санын еселеу. 2008 жылдан бері үзбей жалғасқан турнир өзінің көздеген межесін бағындырып келе жатыр, – дейді «Saryarqa samaly» газетінің бас редакторы Нұрбол Жайықбаев.
Жарыс рапид түрі бойынша, 9, 11, 13, 15, 16 жас және одан жоғары жастағы спортшылар арасында жалғасуда. Биылғы додаға Батыс Қазақстан облысынан сол өңірдегі тоғызқұмалақ федерациясының президенті Данияр Орынбасаров 6 шәкіртін ертіп келіпті. Бапкер Керекуге бірінші рет келіп отырғандарын жеткізді. Ал Ақсу қаласының команда жетекшісі Гүлжан Сапарова 18 баланы үкілеп қосқанын баяндады. «Жыл сайын өтетін бұл турнирдің бірде-бір ойынын қалдырған емеспіз. Осы турнирге 18 бала дайындап алып келдім. Олардың ішінде 3 спортшы – республикалық, халықаралық деңгейде өткен турнирлердің жеңімпазы. Тәлімгерлеріме үлкен үміт артып отырмын», дейді ол.
Павлодар облыстық тоғызқұмалақ федерациясының вице-президенті Арыстан Қапаев бүгінде өңірде 2 мың адам ұлттық спортпен тұрақты айналысатынын айтады. Аймағымызда 2 халықаралық дәрежедегі спорт шебері, 20-дан астам спорт шебері және көптеген спорт шеберлігіне кандидаттар бар. Жуықта Ринат Керейбаев ел чемпионатын ұтып, енді алда өтетін әлем біріншілігіне дайындалуда. Ал Жанат Қаймолдин мен Жәмила Баялдашева - халықаралық турнирлердің жүлдегері. Аяжан Егімбай есімді бойжеткен жастар арасындағы біріншіліктерде алдыңғы орындардан көрінуде. Аймақ тоғызқұмалақшылары республикалық рейтингте үздік үштіктен түсіп көрмеген.
Жарыстың бас төрешісі Шәріп Қашкеновтің айтуынша, «Шахмат үйінің» сыйымдылығы мұндай шамадағы ойыншыларды бірден қабылдауға қауқарсыз. Жыл сайын дәл осы турнирге қатысушылар көп жиналатындығы себепті, орын жеткізе алмай қысылып қаламыз, дейді. Сондықтан тоғызқұмалақшыларға арналған спорт сарайы алдағы уақытта кеңейтілсе немесе жаңадан салынып берілсе деген тілегін жеткізді.
ПАВЛОДАР