«Хабар» арнасының тікелей эфирінде ҚР Президенттігіне кандидаттардың теледебаты өтіп жатыр, деп жазады Egemen.kz.
Сайлауалды теледебат барысында кандидат Қарақат Әбден Салтанат Тұрсынбековаға сексистік қағидаттарды қолдау туралы сұрақпен жүгінді. Ол Тұрсынбекованың осы тақырыпты жиі сынайтынын еске салды.
«Әйел әйелге осындай сұрақ қойғанда біртүрлі болып көрінеді. Қарақат ханым, сіз құрт пісіріп, қымыз құйдыңыз, бірақ халықтың дәстүріне аса мән бермеген сияқтысыз. Қазақ халқында ешқашан сексизм болған емес. Егер сіз мені білсеңіз, мен кәсіби заңгермін, яғни мен біреудің құқығын қорғай алмасам, онда ешқашан ешкімнің құқығын да бұзбаймын. Сексизм мен агеизм мен үшін өте оғаш ұғымдар. Сондықтан сіздің сөздеріңізді орынсыз деп санаймын», деді Салтанат Тұрсынбекова.
Үміткер құқық қорғаушы ретінде бүкіл өмірін әйелдерді құтқарумен өткізгенін айтты. Салтанат Тұрсынбекова Қарақат Әбденді дағдарыс орталықтарына бірге барып, мұқтаж аналар мен әйелдерге көмектесуге шақырды.