Кеше Алматыда өткен ТМД мемлекеттері Салық (қаржы) тексеру органдары басшылары үйлестіру кеңесінің ХІІ отырысына қатысушылар сыбайлас жемқорлыққа қарсы біздің еліміздегі күрес тәжірибесін бұрынғы кеңестік кеңістіктегі ең жақсылардың бірі деп таныды. Екі күнге созылатын бұл салиқалы форумға Қазақстанның, Ресейдің, Әзірбайжанның, Арменияның, Беларусьтің, Қырғызстанның, Латвияның, Молдованың, Тәжікстанның, Украина мен Эстонияның құқық қорғау қызметтерінің өкілдері қатысуда.
Қазақстан Республикасының Экономикалық қылмысқа және сыбайлас жемқорлыққа қарсы күрес агенттігі төрағасының орынбасары Андрей Лукиннің сөзіне қарағанда, Қазақстанның Қаржы полициясы академиясы сыбайлас жемқорлықпен, экономикалық және салық қылмыстарымен күрес жөніндегі бөлімшелер үшін білікті кадрлар даярлау орайындағы базалық оқу орнына айналған. Мұнда қазірдің өзінде Ресейден, Беларусьтан, Қырғызстаннан, Молдова мен Украинадан курсанттар келіп тәлім алып кеткен.
Ресей Федерациясы ішкі істер министрінің орынбасары Евгений Школов қазақстандық қаржы полициясының сыбайлас жемқорлық пен экономикалық қылмыстарға қарсы пәрменді әрекет етудегі елеулі табыстарын атап өтті. Оның айтуынша, ТМД елдерінің құқық қорғау органдары Қазақстан Республикасының көлеңкелі экономика үлесін кеміту жөніндегі озық тәжірибесін қабылдап алып, коррупцияға қарсы мониторингтің өңірлік тетіктерін жасаулары, лаңкестікті қаржыландыруға және ақшаны жасырып-жабуға қарсы күрестегі іс-қимыл бірлігін нығайта түсулері қажет.
Қорғанбек АМАНЖОЛ.